ێستا هه‌رێمی کوردستان له‌ڕووی سیاسی و ئابوورییه‌وه به دۆخێکی قه‌یراناوی دژواردا تێده‌په‌ڕێت، جۆری مامه‌ڵه‌کردن و بژارده‌کانی ده‌سه‌ڵاتدارێتی کوردی له تێپه‌ڕاندنی قه‌یرانه‌کان، نه‌ک ئومێدبه‌خش نین، بگره دۆخه‌کان ئاڵۆزتر ده‌که‌ن.
ئه‌وه‌ی وه‌ک پرسی چاره‌سه‌ر ده‌ستی بۆ براوه، ئاسۆکه تاریکتر ده‌کات، نه ئه‌وه‌یه ببێته هۆی چاره‌سه‌رێکی کاتی تا تێپه‌ڕاندنی ئه‌م قۆناغه، نه ئه‌وه‌شه ببێته بناغه‌یه‌ک بۆ چاره‌سه‌رێکی ریشه‌یی له دوورمه‌ودادا.
پێده‌چێت ناوه‌نده‌کانی بڕیار که پێکدێن له چه‌ند کاره‌کته‌رێکی پارتی و یه‌کێتی، هێشتا به ته‌واوی درکیان به مه‌ترسیی ئه‌م قه‌یرانانه نه‌کردبێت، چونکه جۆری ته‌رحکردنیان بۆ چاره‌سه‌ر له پینه‌وپه‌ڕۆ ده‌چێت و پێیانوایه به‌و جۆره زه‌مه‌ن یارمه‌تیده‌ر ده‌بێت له تێپه‌ڕاندنی ئه‌م ئه‌زمه‌یه، وه‌ک چۆن له رابردوودا زۆر کێشه‌یان به‌و جۆره تێپه‌ڕاندووه.
ناکرێت له دۆخێکی وه‌ک ئێستادا که هاوکێشه نێوده‌وڵه‌تی و هه‌رێمایه‌تییه‌کان له‌سه‌ر ئه‌م ناوچه‌یه‌ی ئێمه له‌به‌رده‌م پێشهات و گۆڕانکاریی گه‌وره‌دان، دۆخی سیاسیی هه‌رێمی کوردستان به‌م جۆره‌ی ئێستا بێت. هه‌ستکردن به به‌رپرسیارێتی ئه‌و ئه‌گه‌ر و پێشهاتانه، ده‌بوو ئه‌وه‌مان له‌سه‌ر فه‌رز بکات، هه‌موو ناکۆکی و کێشه ناوخۆییه‌کان وه‌لا بنێین و پێکه‌وه به‌رپرسیارێتی تێپه‌ڕاندنی ئه‌م قۆناغه بگرینه ئه‌ستۆ، به‌ڵام پێناچێت بیرکردنه‌وه‌کان به‌وجۆره بن.
چونکه له هه‌لومه‌رجێکی وا هه‌ستیار و موحریجدا مه‌رجی گۆڕان بۆ به‌شداری له پێکه‌وه هه‌ڵگرتنی به‌رپرسیارێتی ئه‌وه بێت بگه‌ڕێته‌وه په‌رله‌مان و حکومه‌ت، حکومه‌تێک که مه‌گه‌ر هه‌ر ته‌نیا گۆڕان ئاره‌زووی به‌شداریکردنی هه‌بێت، که‌چی ئاماده نین ئه‌وه‌ش قبوڵ بکه‌ن، ئیتر چۆن ناوماڵی کورد رێکده‌خرێته‌وه.
ئه‌وه‌ی ده‌گوزه‌رێت یان بێده‌ربه‌ستی و بێباکیه له‌ئاست ئه‌و پێشهاتانه‌ی چاوه‌ڕوان ده‌کرێن، یان هه‌ستنه‌کردنه به مه‌ترسی و به‌رپرسیارێتی قۆناغه‌که. هه‌ر کامیان بێت، خوڵقێنه‌ری کۆمه‌ڵێک قه‌یرانی دیکه ده‌بێ که له یه‌ک دوو مانگی داهاتوودا دێنه به‌رده‌ممان و ئه‌وکات کورد واته‌نی ته‌ڕو وشک پێکه‌وه ده‌سووتێن.
ئه‌وه‌ی په‌یوه‌سته به پرسی چاکسازی و وه‌ک ده‌ستپێک له قووتی خه‌ڵک و مووچه‌ی فه‌رمانبه‌رانه‌وه ده‌ستیپێکردووه، سه‌ره‌تاکانی ناڕه‌زایه‌تی خه‌ڵک له‌و هه‌نگاوه وه‌ده‌رکه‌وتوون و کاردانه‌وه و لێکه‌وته‌کانی ئاماژه‌ی دڵخۆشکه‌ر نین. له ئاساییترین حاڵه‌تیشدا ئه‌گه‌ر کاردانه‌وه و ناڕه‌زایه‌تییه‌کان بریتی بێت له مانگرتن، ئه‌وه په‌کی ژیان ده‌خرێت له هه‌رێمی کوردستان.
ناڕه‌زایه‌تی ته‌نیا به مانگرتن کۆتایی نایه‌ت و مل ده‌نێت بۆ توندوتیژی، چونکه په‌یوه‌سته به نان و ژیانه‌وه، ئه‌وکاتیش نه‌ک هه‌ر ئاشتیی کۆمه‌ڵایه‌تی تێکده‌چێت، ره‌نگه ده‌رهاویشته‌ی زۆر خراپی لێبکه‌وێته‌وه که له چاوه‌ڕوانیی ئێستای ده‌سه‌ڵاتدارانی هه‌رێمدا نه‌بێت.
حکومه‌ت ته‌نیا گرفتی له‌وه‌دا نییه که داهاتی که‌م بووه‌ته‌وه، به‌ڵکو کێشه‌که‌ی دوو شته، یه‌که‌میان ئه‌وه‌یه که خه‌ڵک متمانه‌ی به‌وه نییه حکومه‌ت پاره‌ی نییه و باوه‌ڕ به‌و قسانه ناکرێت که له‌باره‌ی قه‌یرانی داراییه‌وه ده‌وترێن، کێشه‌ی دووه‌میش ئه‌وه‌یه که حکومه‌ت وه‌کو خێزانێکی به‌ناز و خواپێداو وایه، له‌پڕ تووشی کێشه‌یه‌ک ده‌بن و نازانن چۆن مامه‌ڵه‌ی له‌گه‌ڵ بکه‌ن و هه‌رچۆنێک ده‌ستی بۆ ده‌به‌ن خراپتری ده‌که‌ن.
ئێستا حکومه‌ت به‌و جۆره‌ی لێهاتووه، سه‌ری لێشێواوه، نازانێت چی بکات و له‌کوێوه ده‌ستپێبکات تا ده‌ره‌قه‌تی ئه‌م قه‌یرانه بێت. بێگومان که داهات که‌م بووه‌وه پێویسته له به‌رانبه‌ردا خه‌رجیه‌کانیش که‌م بکرێنه‌وه، به‌ڵام ئه‌وه‌ی حکومه‌ت ده‌ستی بۆ بردووه په‌یوه‌ندی به رۆحی کۆمه‌ڵگه‌وه هه‌یه، نه‌ده‌بوو یه‌که‌م هه‌نگاو ده‌ستبردن بێت بۆ قووتی خه‌ڵک، له‌بری ئه‌وه‌ی هه‌نگاوی یه‌که‌م که‌مکردنه‌وه‌ی مووچه بێت به‌و ئه‌ندازه‌یه‌ی ئێستا، که پێشتر ئه‌زموونی ئه‌وه هه‌بوو به نیوه‌کردنی مووچه ده‌رئه‌نجامه‌کانی چی بوون، به‌ڵام ئه‌وه‌ی ئێستا حکومه‌ت له خشته‌یه‌کدا بڵاوی کردووه‌ته‌وه، به‌شێکیان زۆر له نیوه که‌متری بۆ ده‌مێنێته‌وه.
Kurdish