هه‌میشه بۆیه دڵم به نه‌وتی كوردستان خۆش بوو بیرم له‌وه ده‌كرده‌وه كه ره‌نگه به‌هۆی ده‌رهێنان و خۆماڵی كردنی نه‌وته‌كه‌مانه‌وه زۆر كارتی سیاسی كاریگه‌رمان بكه‌وێته ده‌ست و به‌م هۆیه‌شه‌وه ببینه جۆرێك له فشار بۆ حكومه‌تی ناوه‌ند و ده‌وڵه‌ته دراوسێكانمان و ئیتر به‌هۆی سه‌رمایه و ئابوری به‌هێزی كوردستانه‌وه ئیتر نه‌توانن چاومان لێ سوور بكه‌نه‌وه و خه‌ڵكی ئه‌م هه‌رێمه ئیتر بۆ ئه‌به‌د بكه‌ونه خۆشی و ژیانێكی ئاسوده‌وه، هه‌میشه بیرم له‌وه ده‌كرده‌وه له‌به‌ر ئه‌وه‌ی به‌داخه‌وه له كوردستان جگه له نه‌وت خاوه‌نی هیچ سه‌رچاوه‌یه‌كی تری وه‌كو كشتوكاڵ و پیشه‌سازی و ته‌كنه‌لۆژیا و خواردن نین، ئه‌وا نه‌وت ده‌بێته فریادڕه‌سێكی باش بۆ داهاتووی ئه‌م وڵات و نه‌ته‌وه‌یه و ده‌توانین سیستمی ته‌ندروستی باش،سیستمی په‌روه‌رده‌ی باش،ڕێگاوبانی باش،زانكۆی باش، كاره‌با و ئاو و سوته‌مه‌نی باش فه‌راهه‌م بكه‌ین،به‌ڵام به‌داخه‌وه چه‌ندین ساڵ دوای ده‌رهێنان و فرۆشتنی نه‌وته‌كه‌مان نه‌ك نه‌بووینه خاوه‌نی هیچ كام له‌م پڕۆژه خزمه‌تگوزاری و ستراتیژیانه به‌ڵكو زۆرێكیشیان كشانه‌وه دواوه و رۆژ دوای رۆژیش خراپتر ده‌بن.
راسته ئێستا خاوه‌نی نه‌وتین، خاوه‌نی داهاتی ناوخۆین له ڕێگه‌ی گومرگ و كاره‌با و هاتوچۆ و موڵك و كۆمپانیای زه‌به‌للاحه‌وه، به‌ڵام به‌داخه‌وه خاوه‌نی خراپترین جۆری به‌ڕێوه‌بردنی كایه گرنگه‌كانی ژیانی كۆمه‌ڵایه‌تی و سیاسین له‌م هه‌رێمه‌دا، به‌داخه‌وه نه‌وت نه‌ك نه‌یتوانی ببێته هۆی دروستكردنی كۆمه‌ڵێك سیستمی باشی خزمه‌تگوزاری له‌م وڵاته‌دا به‌ڵكو بوو به هۆكارێك بۆ راگرتن و فه‌وتاندنی قوتی ژیانی ئه‌م میلله‌ته هه‌ژاره.
سیاسیه‌كانی ئێمه نه‌یانتوانی سیاسه‌تێكی باشی نه‌وت په‌یڕه‌و بكه‌ن به‌رامبه‌ر به حكومه‌تی ناوه‌ند بۆیه حكومه‌تی ناوه‌ند زۆر زیره‌كانه توانیی به‌هێزترین كارتی سیاسی دژی ئێمه به‌كار بهێنێ ئه‌ویش به بڕینی بودجه و موچه‌ی هه‌رێم، به‌ڵام حكومه‌تی هه‌رێم ئه‌لته‌ناتیڤێكی به‌هێزی نه‌بوو بۆ ڕووبه‌ڕوو بوونه‌وه‌ی ئه‌و قه‌یرانه‌ی كه ڕووی تێكردین،راسته قه‌یرانه‌كه كاریگه‌ری راسته‌وخۆی دروست كرد له‌سه‌ر ژیانی خه‌ڵك،به‌ڵام له هه‌مان كاتدا گه‌وره‌ترین گورزیش بوو وه‌شێنرا له سیاسه‌تی به‌ڕێوه‌بردنی هه‌رێمی كوردستان،چونكه وه‌ك وتم حكومه‌تی ئێمه ئه‌لته‌رناتیڤێكی وای نه‌بوو كه ڕووبه‌ڕوو ببێته‌وه و له هه‌مانكاتیشدا نه‌یتوانیبوو له ڕابردوودا كارتی له‌وه به‌هێزتر ڕاكێشێت به‌رامبه‌ر به ناوه‌ند له كاتی دروست بوونی قه‌یرانێكی له‌م شێوه‌یه‌دا.
رۆژ دوای رۆژ سیاسیه‌كانی ئه‌م هه‌رێمه لێدوان ده‌ده‌ن و باس له چاره‌سه‌ربوونی قه‌یرانه‌كان ده‌كه‌ن و هه‌ندێك له كه‌ناڵی میدیاییش وه‌ك ئه‌وه‌ی هه‌نگوینیان له داردا دۆزیبێته‌وه یه‌ك له دوای یه‌ك هه‌واڵی له‌سه‌ر دروست ده‌كه‌ن و بابه‌تی بۆ زیاد ده‌كه‌ن،كه‌چی چه‌ند رۆژێك دواتر هه‌موویان بێده‌نگ ده‌بنه‌وه و هه‌موو شتێكیش هه‌ر وه‌كو رۆژانی ڕابردووی لێدێته‌وه و نه ئاسۆكانی چاره‌سه‌ر ده‌رده‌كه‌ون و نه هیچیش چاره‌سه‌ر ده‌بێ.
ئێستا باری دارایی هه‌رێم گه‌یشتۆته قۆناغێك كه ره‌نگه ئیتر ته‌حه‌مول كردنی بگاته قۆناغی ئه‌سته‌م و ئیتر خه‌ڵك ناچار بێت كه نه‌توانێ پێداویستیه‌كانی خۆی دابین بكات.
سه‌یر له‌وه‌دایه به‌م باره خراپه‌ی دارایی هه‌رێم كه‌چی حكومه‌ت رۆژ دوای رۆژ كرێی ئاو و كاره‌با و سوته‌مه‌نی و سزای هاتوچۆ و زۆر شتی تریش له‌سه‌ر خه‌ڵك گران ده‌كات. به‌جۆرێك ئه‌و بڕه كه‌مه‌ی موچه كه به دوو مانگ جارێك ده‌یدات به فه‌رمانبه‌ران ده‌بێ له هه‌مان كاتدا موچه‌خۆر به‌شێكی زۆری بداته‌وه به حكومه‌ت بۆ دابین كردنی ئه‌و پێداویستیانه‌ی له سه‌ره‌وه ئامژه‌م بۆ كردووه كه رۆژ دوای رۆژیش گرانتری ده‌كه‌ن.
من ده‌پرسم ئایا نه‌وتی هه‌رێم گه‌ر نه‌توانێ ته‌نها موچه‌ی كارمه‌نده‌كانی خۆی دابین بكات، له‌و چه‌ند ساڵه‌ی رابردوودا چی پێكراوه و چی لێكراوه و چۆن سیاسه‌تی بۆ داڕێژراوه بۆ ئیداره‌دانی؟
ئایا ئه‌وه‌ی له كاتی بانگه‌شه‌دا كه هه‌ندێك له بانگه‌شه‌كارانی كورسیه‌كانی په‌رله‌مان بانگه‌شه‌یان بۆ ده‌كرد و ده‌یانگوت به ته‌نها به داهاته‌كانی ناوخۆ ده‌توانین دوو به‌رابه‌ری موچه‌ی فه‌رمانبه‌ران دابین بكه‌ین،ئایا ئه‌وان بۆچی هیچ ده‌نگێكیان نییه و روونكردنه‌وه ناده‌ن؟
ئایا نه‌وتی كوردستان و داهاته‌كانی تری وه‌كو گومرگ و كامێراكانی هاتوچۆ و موڵك هه‌روه‌كو خۆیان نین بگره زیادیشی نه‌كردووه ؟
بۆچی ئه‌وسا بۆ بانگه‌شه پاره‌یه‌كی زۆر بوو و به‌شی موچه‌كه‌ی
Kurdish