قـەیـرانـی ئـاو هـەڕەشـە لـەجـیـهان دەكـات ‌

ئاو یەكێكە لەگرنگترین هۆكاری مانەوەی ژیان لەسەر زەوی. ئاو ئەو مادەیەیە كە لەهەر كەلتوورو جوگرافیایەكدا مانایەكی تایبەتی خۆی هەیە، هەروەها بەیەكێك لەگرنگترین ئەو سەرچاوە سرووشتیانە ‏دادەنرێت، كە كلیلی هێنانەدی هەموو پێكهێنەرەكانی ژیانە، بوونی ئاو لەژیانی مرۆڤدا روحی‌و سیاسی‌و كۆمەڵایەتییە، بەبێ‌ بوونی ئاو ژیانی زیندەوەران بەردەوام نابێت‌و ژینگەكەشیان تێكدەچێت. ‏ساڵانە لەجیهاندا بەهۆی زۆربوونی ژمارەی دانیشتووانی جیهان، بە بەراورد بەسنووردارێتی بڕی ئاوی شیاو بۆ بەكارهێنان لەلایەك‌و كەمبوونەوەی رووبەرو بڕی ئاوەكان لەسەر زەوی‌و ژێرزەوی ‏بەهۆی گۆڕانكاری كەش‌و هەواوە لەلایەكی تر، وایكردووە كە بڕی ئاوی سازگارو شیاو كەم ببێتەوەو قەیرانی كەم ئاوی رووبدات، بەجۆرێك كە نەتوانرێت بڕی ئاوی پێویست دابین بكرێت بۆ ئەو ‏زۆربوونە بەردەوامەی دانیشتووانی جیهان.‏