وته‌بێژى وه‌زاره‌تى كاروكاروبارى كۆمه‌ڵایه‌تى حكوومه‌تى هه‌رێمى كوردستان ئاشكراى كرد،له هه‌وڵدان بۆ ئه‌وه‌ى له ساڵى (2018) ه‌وه ده‌ست بكه‌نه‌وه به پێدانى قه‌رزى بچووك به گه‌نجان.
هه‌مزه مه‌غدید، وته‌بێژى وه‌زاره‌تى كار و كاروبارى كۆمه‌ڵایه‌تى ڕاگه‌یاند “ئێمه وه‌ك وه‌زاره‌ت ڕه‌زامه‌ندین له‌سه‌ر ئه‌وه‌ى، قیستى قه‌رزى بچووك، كه پێشووتر دراوه‌ته گه‌نجان وه‌ربگیردرێته‌وه و جارێكى دیكه ده‌ست بكرێته‌وه به پێدانى قه‌رزه‌كه به گه‌نجان”.
ئاماژه‌ى به‌وه‌شدا، كه بۆ ئه‌و مه‌به‌سته ئه‌مڕۆ (چوارشه‌ممه 15 / 11 / 2017) ئه‌ندامانی لیژنه‌ی تایبه‌ت به تاوتوێكردنى پێشنیاز و داواكارییه‌كانى ئه‌و پرسه، وه‌زاره‌تی كار و كاروباری كۆمه‌ڵایه‌تی له‌گه‌ڵ نوێنه‌رى وه‌زاره‌تى دارایی و وه‌زاره‌تى پلاندانان، كۆبوونه‌وه.
ڕوونیشی كرده‌وه، كه له‌میانى گفتۆگۆكه‌دا بڕیاردرا به‌دواداچون بۆ كاراكردنه‌وه‌ى هه‌ردوو سندوقی ده‌سته‌به‌ری كۆمه‌ڵایه‌تی و قه‌رزی بچووكی لاوان له ئه‌نجومه‌نى وه‌زیران بكرێت، هاوكات نووسراوى داواكارى بۆ حكوومه‌ت كرا كه له‌ساڵی نوێوه (2018) قیستى قه‌رزى بچووك له هاوڵاتیان وه‌ربگیرێته‌وه و پێدانی قه‌رزه‌كه‌ش به گه‌نجان به‌پێى ڕێنمایی و مه‌رجه دیاریكراوه‌كان، ده‌ست پێبكاته‌وه.
هه‌روه‌ها وتیشی “پلانه‌كه به‌شێوه‌یه‌ك داڕێژراوه، كه بارگرانى نه‌كه‌وێته سه‌ر حكومه‌ت، چونكه به‌پێى پلانه‌كه ئه‌و قه‌رزه‌ی كه لای هاووڵاتیانه وه‌رده‌گیرێته‌وه و ده‌خرێته ژماره‌یه‌كى بانكی تایبه‌ت، دواتر به‌پێی رێنمایى و بڕیارێك جارێكی تر به‌سه‌ر گه‌نجان دابه‌ش ده‌كرێته‌وه”.
Kurdish