سەرۆکی ژووری کشتوکاڵی تورکیا، شەمسی بایراکتار رایگەیاند کە ساڵانە نیو ملیۆن تۆن شووتی لە تورکیا فرێ دەدرێت.
لە راگەیەنراوێکدا شەمسی بایراکتار، ژمارەیەک زانیاری لەسەر کەرتی کشتوکاڵ، بە تایبەت بەرهەمهێنانی شووتی و کاڵەک لە تورکیا بڵاوکردووەتەوە.
سەرۆکی ژووری کشتوکاڵی تورکیا، شەمسی بایراکتار ئاماژە بەوە دەکات تورکیا کە لەدوای چین دووەم وڵاتی جیهانە لە بەرهەمهێنانی شووتیدا و لە ئێستادا ساڵانە نیو ملیۆن تۆن شووتی و ٢٠٠ هەزار تۆن کاڵەک فرێ دەدرێت. لە کاتێکدا بەرهەمی ٢٠١٥-٢٠١٦ لە شووتیدا، ٣ ملیۆن و ٩١٩ هەزار تۆن بووە و یەک ملیۆن و ٧٢٠ هەزار تۆن کاڵەکیش بەرهەم هاتووە.
شەمسی بایراکتار هۆکاری فرێدانەکەش دەگەڕێنێتەوە بۆ ئەوەی کە لە میانی بازاڕکردندا، بەرهەمهێنەران رووبەڕووی ناسەقامگیری بازاڕ و گۆڕانکاری نرخ و تێچوون دەبنەوە و وتی:
“بە هۆی زیادەی رێژەی خستنەڕوو لەچاو خواستدا بەرهەمی کاڵەک و شووتی گەورەترین زیانی بەرکەوتووە. لە بەهاردا یەک کیلۆگرام شووتی هاوردە بە ٣ لیرە دەفرۆشرێت بە کڕیاری ناوخۆ، دواتر لە مانگی حوزەیراندا بەرهەمی خۆماڵی دێتە بازاڕ، بە خێرایی نرخەکەی دادەبەزێت و یەک کیلۆگرام بەرهەمی ناوخۆ لە شووتی بە ١٥-١٨ قوروش دەفرۆشرێت. بەم نرخە ناتوانرێت بڕی تێچووەکەی دابین بکرێت. بۆیە لە پێناو ئەوەی جووتیاران تووشی هیچ کێشەیەک نەبن و غەدریان لێنەکرێت دەبێت شووتی و سەوزە و میوە لەچوارچێوەی دڵنیایی کشتوکاڵیدا وەربگیرێت”.
Kurdish