نزیكەی سێ ساڵە 18 یەكەی كارەبا لەهەرێم لەكاركەوتون، غەرامەی یەكانیش مانگانە لەئەستۆی حكومەتدایە، بەهۆی ئەو غەرامە زۆرەش لەئێستادا ژمارەیەك لەیەكەكان بەعیراق دراوە بۆ دابینكردنی بەشێك لەكارەبای موسڵ، بریكاری وەزارەتی كارەبای هەرێمیش ڕایدەگەیەنێت، “جگە لەو چەند یەكەیە، هیچ كارەبایەك هەناردەی شارەكانی دیكەی عیراق ناكەین”.
هۆگر شاڵی بریكاری وەزارەتی كارەبای هەرێم ڕاگەیاند، “ئێمە بەگوێرەی ئەو توانا مادیەی هەمانە، توانیومانە 12- 14 كاتژمێر كارەبا دابینبكەین، ئەوەی دەمێنێتەوە، لەڕێگەی مۆلیدە ئەهلیەكانەوە پڕدەكرێتەوە”.
وتیشی:”سیاسەتی حكومەتی هەرێمیش ئەوەیە كە تا لەتوانادا هەبێت، حكومەت هەوڵدەدات كارەبا دابین بكات و بخرێتە ناو تۆڕی كارەباوەو بەهاوڵاتیان بدرێت”.
سەبارەت بەو بڕە كارەبایەش كەدەوترێت بەشاری موسڵ (دوەم گەورەترین شاری عیراق ) دەدرێت شاڵی وتی:”ئەوە ئەو یەكانەن كە ئێمە لەتواناماندا نییە كارەبای پێ بەرهەم بهێنین، عیراق بۆخۆی دەیانخاتەگەڕو كارەبای بۆ موسڵ پێ دابیندەكات، واتە پەیوەندیی بەهەرێمەوە نییە”.
لەبارەی ئەوەش بۆچی حكومەتی هەرێم هەوڵنادات ئەو یەكانە بەگەڕبخاتەوە، بریكاری وەزارەتی كارەبا وتی:”ئێمە پارەمان نیە گازوایل بۆ ئەو یەكانە بكڕین، هێڵەكانی كارەبا تەحەمولی ئەو كارەبایە ناكات، لەبەرئەوە ڕێگەماندا بەسێ كۆمپانیا كە لەگەڵ بەغدا كاردەكەن، ڕێكەوتنیان لەگەڵ كراوە لەڕێگەی ئەو كۆمپانیایانەوە گازوایلیان بۆ دابیندەكرێت”.
ئەوەشی نەشاردەوە، دوای خستنەوەكاری یەكەكانی كارەبا، “ڕێكەوتن كراوە لەگەڵ كۆمپانیاكان، ئەو داهاتەی لەبەغدای وەردەگرن پشكی هەرێمی كوردستانیشی تێدا دەبێت بەڕێژەی 50% دەبێت بیگەڕێننەوە”.
هۆگر شاڵی جەختیكردەوە، “هەرێمی كوردستان لەو پرۆسەیەدا سودمەند دەبێت، چونكە كۆمپانیاكانی بەرهەمهێنانی كارەبا، كارەبا بەدەرەوە دەفرۆشنەوە، ئێمەش ئەگەر خۆمان سوتەمەنیمان پێ دابین بكرایە، نەماندەناردە دەرەوە”.
ئەوەشی باسكرد، بەو كۆمپانیایانەی یەكەكانی كارەبا بۆ عیراق دەخەنەوەكار وتوە:”هەركاتێك لەتواناماندابێت گازوایل دابینبكەین، كارەباكەتان دەبڕین، ئەوانیش ڕەزامەندبون بڕی ئەو كارەبایەش نزیكەی 200 مێگاواتە”.
Kurdish