پڕۆگرامێك بۆ دۆزینەوەی هەلی كار و بووژاندنەوەی ئابووری ‌ ‌

03/08/2017 171 Views
ەمەبەستی دروستكردنی پردێك لەنێوان كەرتی تایبەت‌و خوێندكارانی زانكۆكان‌و بووژاندنەوەی ئابووریی كوردستان، خولێكی تری نوێی پڕۆگرامی راهێنانی تواناكانە كە پێدەنێتە ساڵی چوارەمی، دەستیپێكرد، بە بەشداری زیاتر لە ٨٠٠ خوێندكاری زانكۆكانی كوردستان.

سەبارەت بە وردەكاری ئەو پڕۆگرامە، خاتوو دیلان ئاكرەیی بەڕێوەبەری پڕۆگرامی راهێنانی تواناكان  ڕاگەیاند: ئەو پڕۆگرامە بریتییە لە شێوازێكی فێربوون بۆ پەرەپێدانی شارەزایی‌و تیۆری بەدەستهاتوو لەكاتی خوێندن لەڕێگای پراكتیزەكردن لەكەرتی تایبەتدا.

ئاماژەی بەوەشدا: پڕۆگرامەكە بە هەماهەنگی زانكۆكان‌و وەزارەتی خوێندنی باڵاو توێژینەوەی زانستی‌و سەرۆكایەتی ئەنجومەنی وەزیران بەڕێوەدەچێت‌و ئێستا بەشێكە لە سیستمی خوێندنی باڵا لەكوردستان.

سەبارەت بە ژمارەی بەشداربووانیش، وتی: «لەساڵی یەكەم تەنها ٢٧ فێرخواز بەشداربوون، ساڵی دووەم ١٢٧ خوێندكار، ساڵی سێیەم ٣٢٠، لە خولی ئەمساڵیشدا زیاتر لە 800 فێرخواز لە 90 كۆمپانیای كەرتی تایبەتدا بەشدارن».

بەڕێوەبەری پڕۆگرامەكە وتیشی: «پاش بەدواداچوونێكی ورد بۆمان دەركەوت كە پەیوەندی نێوان زانكۆكان‌و كەرتی تایبەت نیمچە پچڕاوەو سوود لەتواناكانی دەستی خۆماڵی‌و دەرچووانی زانكۆكانی كوردستان زۆر كەم وەرگیراوە، بۆیە بیرمان كردەوە كە دەبێت ئەو پەیوەندییە زانستییە دروستبكەین‌و بەشێوەیەكی كرداریی خوێندكاران ئەوەی لە زانكۆكان فێری دەبن بە تیۆری، لەكۆمپانیاكان‌و كەرتی تایبەتدا جێبەجێی بكەن، هەروەها ئەم پڕۆسەیە دەبێتە فاكتەرێك بۆ دۆزینەوەی هەلی كار بۆ دەرچووانی زانكۆكان‌و لەكەرتی تایبەت كە هەردوولا لێی سوودمەند دەبن».
 
 كوردستانی نوێ