حكومه‌تی عێراق ژماره‌یه‌ك مۆڵه‌تی نوێی گه‌ڕان و پشكنین بۆ ده‌رهێنانی نه‌وت و غاز به كۆمپانیا جیهانییه‌كان ده‌دات و ده‌یه‌وێت له‌م رێگه‌وه ئاستی داهاتی كه‌رتی وزه به‌رزبكاته‌وه.
جه‌بار لعێبی، وه‌زیری نه‌وتی عێراق ئاشكرای كرد؛ وه‌زاره‌ته‌كه‌ی به‌نیازه بانگهێشتنامه‌یه‌ك ئاڕاسته‌ی كۆمپانیا جیهانییه‌كانی بواری نه‌وت بكات بۆ به‌شداریی كردن له پرۆژه‌ی پشكنین و په‌ره‌پێدانی هه‌شت ناوچه‌ی نه‌وتی له سنوره‌كانی عێراق له‌گه‌ڵ كوه‌یت و ئێران.
له‌ناو ئه‌و ناوچه نه‌وتیانه‌ی كه وه‌زاره‌تی نه‌وتی عێراق بڕیاریداوه مۆڵه‌تی كاركردن تێیاندا بدات به كۆمپانیاكان، ناوچه‌یه‌كی ده‌ریایی هه‌یه، تائێستا وه‌زاره‌ت هیچ خشته‌یه‌كی كاتی بۆ ئه‌و كاره رانه‌گه‌یاندوه.
عێراق خاوه‌نی چواره‌م گه‌وره‌ترین یه‌ده‌گی نه‌وتییه له‌سه‌ر ئاستی جیهان، تەنها ئه‌مساڵ عێراق بڕی (10) ملیار به‌رمیل نه‌وت بۆ یه‌ده‌گی خۆی زیادكردوە و به‌وهۆیه‌‌وه ئێستا كۆی گشتی یه‌ده‌گی نه‌وتی عێراق (153) ملیار و یه‌ك ملیۆن به‌رمیله.
لەماوەی چەند ساڵی رابردودا، دابه‌زینی نرخی نه‌وت زیانێكی گه‌وره‌ی به ئابوری عێراق گه‌یاند، چونكه نزیكه‌ی (95%)ی داهاتی عێراق له فرۆشتنی نه‌وته‌وه سه‌رچاوه‌ی گرتوه، هه‌وڵدان بۆ زیادكردنی ئاستی به‌رهه‌م و فرۆش بۆ دابینكردنی خه‌رجی شه‌ڕی داعش و ئه‌و كورتهێنانه‌یه به‌هۆی دابه‌زینی نرخی نه‌وته‌وه له دارایی عێراقدا دروستبوه.
Kurdish