ئەمڕۆ 20ی حوزەیرانی 2017، قائیمقامیەتی سلێمانی بەبەشداری یەکە ئیداریەکانی شارەکە کۆبونەوە بۆ دانانی بەرنامەو پلانی ڕۆژانی جەژن، لەئەنجامدا ژمارەیەک ڕێنمایی دەرکران.
لە كۆنگرەیەكی رۆژنامەوانیدا ئاوات محەمەد قائیمقامی پارێزگای سلێمانی ڕایگەیاند: بڕیارمانداوە بردنی ئۆتۆمبێل بۆسەر قەبرسانەکان لەڕۆژانی جەژن قەدەغە بکرێت، ئەمەش بۆئەوەی نەبنە ھۆی دروستبونی قەرەباڵغی و ڕێگرتن لەھاتووچۆی ھاوڵاتیان.
قائیمقامی سلێمانی ئاشكرایكرد هەندێ جۆر یاریمان قەدەغەکردوە و سەرجەم ھێزە ئەمنیەکانمان ئاگادارکردۆتەوە بۆ دەستبەسەرداگرتنیان.
ئاوات محەمەد وتیشی: لیژنەی گەشتوگوزار، پێشوازی لەگەشتیاران دەکات و ڕێنماییان پێدەدات و ڕێنمایی تایبەت بەکردنەوەی چێشخانەو ڕێستۆرانتەکان دەرکراوەو دەبێت زۆرترین چێشتخانەو میوانخانە بەڕوی گەشتیاراندا بکرێتەوە.
سەبارەت بەدەستبەسەرداگرتنی ماتۆڕسکیل و بەکرێدانیان لەڕۆژانی جەژندا قائیمقامی سلێمانی راشیگەیاند: لیژنەیەکی تایبەت بۆ بەکرێدانی ماتۆڕسکێل پێکھێنراوە، لەسبەینێ ٢١ی حوزەیرانەوە دەستبەکاردەبن و لەگەڵ پێشەنگاکانی فرۆشتن و بەکرێدانی ماتۆڕ کۆدەبنەوە.
Kurdish