سەرۆكی شارەوانی سلێمانی بۆ چارەسەركردنی كێشە‌و گرفتەكانی پڕۆژەی چاڤی لاند، پەنا دەباتەبەر پەرلەمانی كوردستان‌و دەڵێت: شارەوانی سلێمانی 17 ملیار دیناری وەكو قەرەبوو داوە بە خاوەن زەویەكانی چاڤی لاند‌و رێگەش بە هیچ كەس‌و كۆمپانیایەك نادەین ژینگە‌و دارستانەكانی سلێمانی تێكبدات.
دوای ئەوەی یوسف یاسین سەرۆكی شارەوانی سلێمانی سەردانی نوسینگەی سلێمانی پەرلەمانی كوردستانی كرد‌و لەگەڵ عومەر عینایەت سەرۆكی لیژنەی شارەوانی‌و گەشتوگوزاری پەرلەمان كۆبوەوە، لە كۆنگریەكی رۆژنامەوانیدا رایگەیاند: لەكاتێكدا یەك مەتر زەوی بە 80 دینار دراوە بە كۆمپانیای چاڤی گەشتیاری كە پارەی جگەرەیەكە، ئیدی ئەوە مانای ئەوە نییە، هەركەس بەئارەزووی خۆی چی ویست بیكات‌و دارستان‌و ژینگەی سلێمانی تێكبدات.
لای خۆشیەوە عومەر عینایەت وتی: هەر كەس‌و كۆمپانیایەك موڵكی گشتی داگیر بكات، پێویستە لێی وەربگیرێتەوە. وتیشی: دەبێت نوێنەرێكی كۆمپانیای ڤاچی لاند بێتە نوسینگەی سلێمانی پەرلەمانی كوردستان‌و ڕوونكردنەوەی پێویست بۆ پەرلەمانتاران بدات.
Kurdish