وەزارەتی دارایی و ئابوری حكومەتی هەرێم بڕی 501 ملیۆن دیناری بۆ دابینكردنی خەرجی تانكەری ئاو بۆ باخچە و پاركەكانی سلێمانی دابین دەكات.
لەوبارەیەشەوە كامەران حەمەساڵح، بەڕێوەبەری باخچەكانی سلێمانی رایگەیاند: وەزارەتی دارایی بڕی 501 ملیۆن دیناریان بۆ ئاودانی باخچە و پاركەكان دابینكردووە و كە بەشی باخچەكانی راپەڕین و بەكرەجۆ و بلوارەكانی تاسڵوجە- سلێمانی و شەقامی بازنەیی مەلیك مەحمودیشی تێدایە.
وتیشی: چەند رۆژێكە تەندەرەكانیان رەوانەی پارێزگای سلێمانی كردووە بۆ راگەیاندنی پڕۆژەكە بۆ ئەو كەسانەی دەیانەوێت بیكەن، دواتر دەست بە ئاودانی باخچە و پاركەكان دەكرێت، بە دابینكردنی ئەو پارەیەش كێشەی ئاودانی باخچە و پاركەكان نەماوە.
هاوكات بەپێی ئاماری باخچەكانی سلێمانی 536 باخچە و 385 بلوار لە سنوری شارەوانی سلێمانیدا بونیان هەیە كە ملیۆنێك و 500 هەزار داریان لەخۆگرتووەو بەڕێوەبەرایەتی باخچەكانیش بۆ ئاودانیان بەرێژەی سەدا (70) پشت بە تانكەر دەبەستێت.
Kurdish