سەرۆکی سەنتەری لێکۆڵینەوە و توێژینەوەی ستراتیژی، باس لە جووڵەی بازاڕ دەکات و ئاماژە بەوە دەکات، کە کۆمپانیای ڕووسنەفت ئامادەیی دەربڕیووە، پێشوەختە ٣ ملیار دۆلار بداتە هەرێمی کوردستان و بەو هۆیەشەوە جووڵە دەکەوێتەوە بازاڕەوە.
د. ئاراس خۆشناو، سەرۆکی سەنتەری لێکۆڵینەوە و توێژینەوەی ستراتیژی بە ماڵپەڕی فەرمی حزبەكەی راگەیاندوە:”لەمەودوا نەوتی هەرێمی کوردستان ڕاستەوخۆ دەڕوات بۆ بۆرسەی جیهان، چونکە جاران لە ڕێی کۆمپانیاکانەوە دەگەییشتە بۆرسەی جیهان و ئیتر لەمەودوا ئەو تاکتیکە نامێنێت. ئەوەش جێی خۆشحاڵییە، کۆمپانیایەکی ڕووسیا بە ناوی (رووسنه‌فت) بڕیاری داوە، ڕاستەوخۆ نەوتی هەرێمی کوردستان هەناردە بکات و پێشوەختەش بڕی 3 ملیار دۆلار بداتە هەرێمی کوردستان، بۆ ئەوەی ئەو پڕۆژانەی ڕاوەستاون، سەرلەنوێ بخرێنەوە گەڕ.”
سەرۆکی سەنتەری لێکۆڵینەوە و توێژینەوەی ستراتیژی وتویەتیشی: ”ئەو پارەیەی کە دێت، بۆ تەواوکردنی ئەو پرۆژانەیە، کە ڕاوەستان. بە گوێرەی ئاماری حکوومەت تا ئێستا 3600 پرۆژەی حکوومی و هەزار پرۆژەی ئەهلی لە هەرێمی کوردستان وەستاون، کە سەرجەم هۆکارەکانی ڕاوەستانی ئەو پرۆژانە بەهۆی قەیرانی داراییەوە بووە، هەڵبەت ناردنی ئەو پارەیە زۆر گرینگە بۆ تەواوکردنی ئەو پڕۆژانە و کاریگەریشی لەسەر جووڵەی بازاڕی کوردستان دەبێت.”
Kurdish