دوای ئەوەی لە رۆژی 16ی نیسان پارێزگاری سلێمانی لەگەڵ نوێنەرانی پارێزگای هەڵەبجەو ئیدارەی ڕاپەڕین و گەرمیان و یەكێتی بەڵێندەرانی كوردستان كۆبوونەوە بەمەبەستی دانانی میكانیزمێك بۆ ئەو بڕە پارەیەی كە لە چوارچێوەی بودجەی پەرەپێدانی پارێزگاكان تەرخان كراوە بەگوژمەی 4ملیارو 800 ملیۆن دینار و بۆ بەڵێندەرانی سنورەكە خەرج دەكرێت.
لە كۆبوونەوەیەكدا بە ئامادەبوونی سەردار قادر ل. پارێزگاری سلێمانی بڕیارێك لەبارەی شێوازی خەرج كردنی ئەو پارەیە پەسەند كرا كە ئەمە دەقەكەیەتی:
لە ژێر ڕۆشنایی ڕێنماییەكانی وەزارەتی پلان دانان و دارایی و ئابوری هەرێم بڕیاردرا بە خەرجكردنی ئەو بڕە پارەیەی كە گوژمەكەی 4ملیارو 800 ملیۆن دینارە بۆ پارێزگای سلێمانی و هەڵەبجە ئیدارەی ڕاپەڕین و گەرمیان تەرخانكراوە بەم شێوەیە:
پارێزگای سلێمانی ڕێژەی %65.84
پارێزگای هەڵەبجە %5.05
ئیدارەی گەرمیان %12.42
ئیدارەی ڕاپەڕین %16.69
ئەم بڕە پارانە لە سەر بنەمای ڕێژەی دانیشتوان دیاریكراوە , لەم ڕێژەیەش %5 بۆ پڕۆژەی گوندە زیان لێكەوتوەكان دەبێت.
یەكێكیتر لە بنەماكانی خەرجكردنی ئەو بڕە پارەیە بۆ بەلێندەرانی تەمویلی ساڵانی 2014 تا ساڵێ 2016 دەبێت .
بەو پێیەش زۆرترین پشكی پارە لەسەرئەم بنەمایە 136 ملیۆن دینار دەبێت و كەمترین پشكی پارە تەنها 49 هەزار دینارە.
پارێزگای سلێمانی ڕای دەگەیەنێت كە لە بەرواری 24 نیسان ناوی سەرجەم بەڵێندەرەكان لە ماڵپەری فەرمی پارێزگای سلێمانی ( slemani.gov )ئاشكرا دەكرێ لەماوەی یەك هەفتەدا خاوەن كۆمپانیا یاخود نوێنەری یاسایی كۆمپانیاكان دەتوانن سەردانی پارێزگار بكەن لە ئەگەری بوونی هەر سەرنج و تێبینیەك.
دواتر دەست دەكرێت بە خەرجكردنی ئەو بڕە پارەیە تەنها لەماوەی یەك مانگدا بۆیە هەركەسێك لەماوەی ئەو مانگەدا شایستەی دارایی وەر نەگرێت بێبەش دەبێت تا گوژمەیەكی تر مافی وەرگرتنی ئەو بڕە پارەیەی نابێت .
Kurdish