بەوێنە لە سلێمانی ده‌ست به‌سه‌ر بڕێكی زۆر گۆشتی خراپبوودا ده‌گیرێت کە ئاماده‌كرابوو بۆ به‌كارهێنان

لیژنه‌ هاوبه‌شه‌كانی قائیمقامیه‌تی
سلێمانی له‌ كارگه‌یه‌كی ئاماده‌كردنی شاورمه‌دا ده‌ستیانگرت به‌سه‌ر بڕێكی زۆر گۆشتدا كه‌ به‌ شێوه‌یه‌كی ناته‌ندروست ئاماده‌كرابوو بۆ به‌كارهێنان.

شه‌وی رابردوو 3-4-2017 له‌ یه‌كێك له‌ گه‌ڕه‌كه‌كانی شاری سلێمانی، لیژنه‌ هاوبه‌شه‌كانی قائیمقامه‌یه‌تی سلێمانی له‌ كارگه‌یه‌كی ئاماده‌كردنی شاورمه‌دا ده‌ستیانگرت به‌سه‌ر بڕی زیاتر له‌ “یه‌ك تۆن و نیو” گۆشتی ئاژه‌ڵی به‌ستوو و گۆشتی مریشكی به‌ستوودا كه‌ خاوه‌نه‌كه‌ی به‌ شێوه‌یه‌كی ناته‌ندروست و به‌ده‌ر له‌ مه‌رج و رێنماییه‌كان ئاماده‌یكردبوو بۆ دروستكردنی شاورمه‌.

گۆران قادر سه‌رۆكی لیژنه‌ هاوبه‌شه‌كانی قائیمقامه‌یه‌تی سلێمانی رایگه‌یاند: له‌ ئه‌نجامی گه‌ڕان و به‌دواداچونه‌كانیان له‌ یه‌كێك له‌ گه‌ڕه‌كه‌كانی سلێمانی توانیان ده‌ستبگرن به‌سه‌ر بڕێكی زۆر گۆشتدا كه‌ بڕه‌كه‌ی زیاتر له‌ “یه‌ك تۆن و نیو” ده‌بوو ئاماده‌كرابوو بۆ دروستكردنی شاورمه‌، به‌ڵام به‌هۆی ئه‌وه‌ی به‌ شێوه‌یه‌كی ناته‌ندروست و به‌ده‌ر له‌ مه‌رج و رێنماییه‌كان هه‌ڵگیرابوو ده‌ركه‌وت له‌ڕووی ته‌ندروستییه‌وه‌ گونجاو نیه‌ بۆ خواردن.

سه‌رۆكی لیژنه‌ هاوبه‌شه‌كان وتیشی: هه‌موو گۆشته‌كه‌ ده‌ستی به‌سه‌ردا گیراوه‌و له‌ به‌رامبه‌ر ئه‌وكاره‌ش خاوه‌نه‌كه‌ی روبه‌ڕووی سزایی یاسایی ده‌كرێته‌وه‌.