وەزارەتی گواستنەوە‌و گەیاندنی عیراق نرخی گەشتە ئاسمانیەكانی نێوان فڕۆكەخانەی بەغدا‌و فڕۆكەخانەكانی هەرێمی كوردستان لە 90 دۆلارەوە بۆ 150 دۆلار زیاد دەكات.
د.فەرهاد قادر ئەندامی پەرلەمانی عیراق رایگەیاند: بەبڕیاری وەزارەتی گواستنەوە‌و گەیاندنی عیراق، نرخی گەشتە ئاسمانیەكانی نێوان فڕۆكەخانەی بەغدا‌و فڕۆكەخانەكانی هەولێر‌و سلێمانی كراوە بە 150 دۆلار، ئەوە لەكاتێكدایە كە پێشتر نرخی بلیتی هاتن‌و رۆشتن 90 دۆلار بووە.
لای خۆشیەوە ئەشواق جاف ئەندامی پەرلەمانی عیراق رایگەیاندوە: لەگەڵ وەزارەتی گواستنەوە‌و گەیاندنی عیراق قسەیان كردوە‌و تەئكیدیانكردۆتەوە: كە نرخی بلیتی هاتن‌و رۆشتن لەنێوان فڕۆكەخانەی بەغدا‌و فڕۆكەخانەكانی هەولێر‌و سلێمانی بۆ 150 دۆلار زیادكراوە.
وتیشی: بەشێكی زۆر لە خوێندكارانی عیراق دەیانەوێت لەكاتی پشووی نیوەی ساڵدا، لەگەڵ خێزانەكانیان سەردانی هەرێمی كوردستان بكەن، بۆیە داوایان لە وەزارەتی گواستنەوە كردوە كە نرخی گەشتەكان بكاتەوە بە 90 دۆلار، بۆ ئەوەی هاوڵاتیان بتوانن گەشت بۆ هەرێمی كوردستان بكەن.
Kurdish