لەیادی (18) هەمین ساڵیادی كۆچی دوایی (موحەمەدی ماملێ)، خەڵاتی ئەو هونەرمەندە كۆچكردووە، پێشكەش بە هونەرمەندی كورد (مەزهەری خالقی) دەكرێت.
مەڵبەندی هونەری ماملێ، هونەرمەندی گەورەی كورد (مەزهەری خالقی) بۆ خەڵاتی (2017) ی ماملێ دەستنیشان كردو بڕیارە لە مەراسیمێكی تایبەتیدا ئەو خەڵاتە پێشكەش بەو هونەرمەندە كوردە بكرێت.
مەڵبەندی هونەری ماملێ، هۆكاری دەستنیشانكردنی خەڵاتی (2017) ی ئەمساڵی، بۆ خزمەتە بەرچاوەكانی ئەو هونەرمەندە كوردە لە بواری گۆرانی و موسیقا، نەخشاندنی گۆرانی بە موسیقای زانستی و سەردەمیانەو تێكەڵكردنی تێكستی جوان و ڕازاوە بۆ میلۆدییەكان گەڕاندەوە. (مەزهەری خالقی) بۆ گەشەپێدانی كلتوورو هونەری كوردی بێوچان لە تێكۆشاندا بووە و لە ساڵی (2003) دا بە بونیادنانی سەنتەرێك بەناوی (ئەنستیتۆی كەلەپووری كورد)، لە هەوڵدا بوون تاكو لەناو جەرگەی كوردستان و بە شێوەیەكی سەربەست و ئازادانە، درێژە بە خەباتی نەپساوەی كلتووری و هونەری بدات.
مەڵبەندی هونەری ماملێ لە دەیەمین ساڵوەگەری كۆچی دوایی هونەرمەند (موحەمەدی ماملێ) دا بە ئامانجی هاندان و پەرەپێدان و گەشەپێدانی هونەر لە ناو كۆمەڵگەی كوردەواری و بە شێوەیەكی فەرمی لە وڵاتی نەرویج دامەزرا.
تاكو ئێستا چەندین كەسایەتی هونەری و فەرهەنگی وەكوو (قالە مەڕە، ئەندریۆس ئیسرائیل، عەباس كەمەندی، عەزیز شارۆخی ناسر ڕەزازی) خەڵاتی ماملێیان وەرگرتووە.
Kurdish