مۆبایلی نۆكیا لە ماوەیەكی زۆر كورتدا بازاڕەكانی چین داگیر دەكات و بەكارهێنەرێكی زۆر داوا تۆمار دەكەن بۆ كڕینی مۆبایلی نۆكیا6 كە نوێترین مۆبایلی زیرەكی كۆمپانیای نۆكیا دوای وەستانی لە بەرهەمهێنانی مۆبایلدا.
لە بارەی پڕ فرۆشی مۆبایلە نوێیەكەی نۆكیاوە، ماڵپەڕی فۆن ئارینا ئاشكرای كرد كە سەرجەم ئەو مۆبایلانەی نۆكیا لە ماڵپەڕی JD.com بۆ فرۆشتن نمایشی كردبوو بە نرخی 247 دۆلاری ئەمریكی فرۆشران.
ماڵپەڕی ناوبراو ڕوونكردنەوەی زیاتر لەسەر شێوازی فرۆشتنەكە بڵاو دەكاتەوە و دەنوسێت كاتی فرۆشتن لە سەعات 10:06 خولەكی بەیانی دەستی پێكردو لە 10:07 خولەكدا مۆبایلەكان فرۆشران.
چاوەڕوانیش دەكرێت لە چەند ڕۆژی داهاتوودا نۆكیا مۆبایلە نوێیەكەی دووبارە بۆ فرۆشتن نمایش بكاتەوە.
جێی باسە كۆمپانیای HMD Global توانی دوای ڕێكەوتنامەیەك ئەم مۆبایلە بە لۆگۆی نۆكیاوە بەرهەمبهێنێت كە چەندین تایبەتمەندی پێشكەوتووی تێدایە، كە پێدەچێت بتوانێت وەك مۆبایلەكانی ئەپڵ و سامسۆنگ بەشێكی زۆر لە بازاڕەكان داگیر بكات.
Kurdish