عيراق لە رێگەی وڵاتانی ئێران و روسیاوە فشار دەخاتە سەر توركیا، بۆ رازیكردنی هەرێمی كوردستان بە رادەستكردنی داهاتی نەوتی هەناردەكراوی هەرێم بە بەغدا.
بەپێی زانیارییەكان حكومەتی عيراق لە رێگای وڵاتانی ئێران و روسیاوە فشاری خستۆتە سەر توركیا، بۆ رازیكردنی هەرێمی كوردستان بە رادەستكردنی داهاتی نەوتی هەناردەكراوی هەرێم بە بەغدا، ئەمەش هاوكاتە، لەگەڵ نزیكبوونەوە توركیا لە ئێران و روسیا.
هەر بەپێی ئەو زانیارییانە، كە سەرچاوەیەكی سیاسی باڵا ئاشكرایكرد: “لەگەڵ بەرزبونەوەی نرخی نەوت لە جیهان، حەیدەر عەبادی هەوڵەكانی بۆ گەڕانەوەی پابەندكردنی حكومەتی هەرێم بە رادەستكردنی نەوت بە بەغدا چڕكردۆتەوە”، روونیشیكردەوە: “بە پێچەوانەی پێشتر لەئێستادا داهاتی نەوتی هەرێم زیاترە لەو بڕە بودجەیە كە دەبێت بەغدا لە چوارچێوەی پشكی لە (17%) رەوانەی هەرێمی بكات”.
وەك ئەو سەرچاوەیە، ئاماژەی پێیدا: “یەكێك لەو بابەتانەی عەبادی لەگەڵ بیناڵی یەڵدرم سەرۆك وەزیرانی توركیا لە سەردانەكەی بۆ بەغدا تاوتوێكردووە، پرسی گەڕانەوەی داهاتی نەوتی هەرێمی كوردستانە بۆ بەغدا”.
لای خۆشیەوە، پەرلەمانتار فایەق مستەفا، رایگەیاند:”رێككەوتنی توركیا و عيراق و وڵاتانی هەرێمایەتی لەسەر دۆسیەی نەوتی هەرێم، یەكێكە لە مەترسیە چاوەڕوانكراوەكانی سەر دۆسیەی نەوتی هەرێم”، ئەوەشی نەشاردەوە:”كورد هەمیشە كارتێكی سیاسیە بە دەست وڵاتانی ئێران و عێراق و توركیا بۆ گەمەی سیاسی”.
Kurdish