دامەزراوەی گشتی فرۆكەوانی مەدەنی عیراق ئاماری ژمارەی هاتوچۆی هاوڵاتیانی لەرێگەی فرۆكەخانەكانی عیراقەوە بڵاوكردەوەو بەپێی ئامارەكەش بەتەنها لەساڵی رابردوودا 6 ملیۆن كەس لەرێگەی فرۆكەخانەكانی بەغدا و بەسرە و نەجەفوە گەشتیانكردوە.
ئامارەكەی دامەزراوەی گشتی فرۆكەوانی مەدەنی عیراق كە سەر بە وەزارەتی گواستنەوەیە ئەوەیخستۆتەروو بەراورد بە ساڵانی رابردوو ژمارەی ئەنجامدانی گەشتە فرۆكەوانیەكان زیادیانكردوە، هەرلەو ماوەیەشدا 26 هەزارو 911 گەشتی هاتن و 27 هەزارو 180 گەشتی دەرچوون تۆماركراون كە زۆرترینیان لە دواین مانگەكانی ساڵی رابردوودا بووە.
هاوكات دامەزراوەكە زیادبونی خواستەكانی لەسەر ئەنجامدانی گەشتی فرۆكەوانی بۆ باشتربوونی كەرتی فرۆكەوانی عیراق و پێشخستنی تەكنەلۆژیاو كرانەوەەی عیراق بەرووی زیاتری ووڵاتاندا گەراندۆتەوە.
Kurdish