هەناردەكردنی فەرشی ئێران بۆ ئەمریكا دەستپێدەكاتەوەو لەدوای هەڵگرتنی گەمارۆكانیشەوە تائێستا، ئێران بە بەهای 50 ملیۆن دۆلار فەرشی بە ئەمریكا فرۆشتووە.
حەمید كارگەر بەرپرسی ناوەندی نیشتمانی فەرشی ئێران رایگەیاند: دوابەدوای لابردنی سزا ئابوورییەكانی سەر وڵاتەكەی هەناردەكردنی فەرش بۆ ئەمریكا دەستیپێكردۆتەوەو لە 8 مانگی یەكەمی ساڵی 2016دا، بە بەهای 50 ملیۆن دۆلار فەرشی كڕیووە، ئەوەش لەكاتێكدایە ساڵی رابردوو ئەو ژمارەیە سفر بووە.
وتیشی: هەناردەكردنی فەرشی ئێرانی بۆ وڵاتی چین زیادیكردوەو لە ماوەی پێنج ساڵی رابردووشدا لە هەشت هەزار دۆلارەوە بۆ 8 ملیۆن دۆلار بەرزبۆتەوە.
بەرپرسی ناوەندی نیشتمانی فەرشی ئێرانی ئەوەشی خستەڕوو: لە سەرجەم پارێزگانی وڵاتەكەیدا پیشەی فەرش چنین بوونی هەیەو نزیكەی یەك ملیۆن كەس لەو بوارەدا كاردەكەن و لەو رێگەیەوە بژێوی ژیانیان دابین دەكەن، هەروەها فەرشی ئێرانیش لەسەر ئاستی نێودەوڵەتی كڕیاری زۆرباشی هەیە.
Kurdish