نه‌وت له‌به‌رزبونه‌وه‌ به‌رده‌وامه‌

نرخی نه‌وت له‌ به‌رزبوونه‌وه‌ به‌رده‌وامه‌، به‌هۆی پێشبینییه‌كان بۆ كه‌مبونه‌وه‌ی نه‌وتی عه‌مباركراوی ئه‌مریكی، هه‌رچه‌نده‌ له‌گه‌ڵ هاتنی جه‌ژنه‌كانی سه‌ری  ساڵدا بازاڕه‌كان به‌ره‌و ڕاوه‌ستان ده‌چن. 



به‌پێی رۆیته‌رز، نه‌وتی خاوی برنت به‌بڕی 22 سه‌نت به‌رزبووه‌و به‌رمیلێكی به‌ 55.57  دۆلار مامه‌ڵه‌ی پێوه‌كرا.



هه‌روه‌ها نه‌وتی خاوی ئه‌مریكی به‌بڕی 26 سه‌نت به‌رزبۆوه‌و به‌رمیلێكی به‌  53.56 دۆلار مامه‌ڵه‌ی پێوه‌كرا.



بازرگانان ده‌ڵێن هۆكاری به‌رزبونه‌وه‌ی نرخه‌كانی نه‌وتی خاو بریتیه‌ له‌ پێشبینیه‌كان بۆ كه‌مبونه‌وه‌ی نه‌وتی خاوی عه‌مباركراوی ئه‌مریكی له‌ هه‌فته‌ی رابردوودا بۆ 2.563 ملیۆن به‌رمیل.



چاوه‌ڕوانده‌كرێت ئێواره‌ی ئه‌مرۆ چوارشه‌ممه‌ ئیداره‌ی زانیاری ووزه‌ی سه‌ربه‌ حكومه‌تی ئه‌مریكا داتا فه‌رمییه‌كانی خۆی سه‌باره‌ت به‌ نه‌وتی خاوی عه‌مباركراوی ئه‌مریكی له‌هه‌فته‌ی ڕابردوودا بڵاوبكاته‌وه‌ و بڵاوكردنه‌وه‌ی داتاكان كاریگه‌ریی ڕاسته‌وخۆی ده‌بێت له‌سه‌ر نرخه‌كانی نه‌وتی خاو. 



له‌وباره‌یه‌وه‌ وانگ تاو، شرۆڤه‌كاری رۆیته‌رز ڕایگه‌یاندووه‌ “پێشبینی  ده‌كه‌م نرخی  نه‌وتی  خاوی ئه‌مریكی بۆ هه‌ر به‌رمیلێك 54.37  دۆلار به‌ رزببێته‌وه‌، نه‌وتی خاوی برنت بۆ هه‌ر به‌رمیلێك بۆ  55.79 دۆلار به‌ رزببێته‌وه‌.”

 

رۆژی 10 ئه‌م مانگه‌، به‌رهه‌مهێنه‌رانی نه‌وت له‌ رێكخراوی ئۆپیك ‌و وڵاتانی ده‌ره‌وه‌ی ئۆپیك كه‌ 11 وڵاتن، بۆ یه‌كه‌مجار له‌ ساڵی 2001ه‌وه‌ رێكه‌وتن به‌هاوبه‌شی به‌رهه‌مهێنانی نه‌وت سنوردار بكه‌ن ئه‌وه‌ش بۆ كه‌مكردنه‌وه‌ و نه‌هێشتنی كه‌ڵه‌كه‌بوونی نه‌وتی خاو به‌و هیوایه‌ی بتوانن نرخه‌كانی نه‌وتی خاو به‌رزبكه‌نه‌وه‌.