بانکی نێودەوڵەتی جیهان رەزامەندی نیشاندا بۆ پێدانی قەرزێکی نوێ بە عیراق، کە بڕەکەی نزیکەی ملیارێک و ٥٠٠ ملیۆن دۆلارە و مەبەست لێی کەمکردنەوەی کاریگەریی دابەزینی نرخی نەوتە لەسەر ئابوریی عیراق و پڕکردنەوەی بەشێک لە خەرجییەکانی شەڕی دژ بە داعش.
بانکی نێودەوڵەتی جیهان لە راگەیەندراوێکدا ئاشکرایکرد، کە بڕی پەسەندکراوی قەرزە تازەکە ملیارێک و ٤٨٥ ملیۆن دۆلارە و بەمە کۆی بەشداریی بانکە نێودەوڵیتییەکە لە عیراقدا دەگاتە نزیکەی ٣ ملیار و ٤٠٠ ملیۆن دۆلار.
بانکەکە لە ساڵی ٢٠١٥دا بە دوو گوژمەی جیاواز (یەکەم: ملیارێک و ٢٠٠ ملیۆن دۆلار، دووەم: ٣٥٠ ملیۆن دۆلار)ی دایە عیراق، ئەمەش پاش تێپەڕینی ساڵێک بەسەر پەلامارەکانی رێکخراوی تیرۆرستی داعش و کۆنترۆڵکردنی نزیکەی سێ یەکی خاکی عیراق.
دەرکەوتنی رێکخراوی تیرۆرستی داعش هاوکات بوو لەگەڵ دابەزینی نرخی نەوت لە بازارەکانی جیهاندا، ئەمەش کاریگەریی راستەوخۆی لەسەر ئابوریی عیراق دروستکرد، بەتایبەت کە وڵاتەکە بەشێوەیەکی سەرەکی لە رووی ئابورییەوە پشت بە نەوت دەبەستێت.
عیراق لە دوای سعودیە، دووەم گەورەترین بەرهەمهێنەری نەوتی ناو رێکخراوی وڵاتانی هەناردەکاری نەوت (ئۆپیک)ە.
فەرید بەلهاج، بەڕێوەبەری بانکی جیهان لە رۆژهەڵاتی ناوەڕاست بە رۆیتەرزی راگەیاند “ئێمە تەماشای دۆخێکی زۆر بێ هاوتا دەکەین، وڵاتەکە بە پرۆسەیەکی چاکسازیی پێکهاتەیی، قوڵ و فراواندا تێدەپەڕێت و لە هەمانکاتدا شەڕێکی خوێناوی دژ بە هێزێکی وێرانکەر ئەنجامدەدات”.
شەڕی دژ بە داعش ٣ ملیار و ٤٠٠ ملیۆن هاوڵێ‌تیی عیراقی بێ ماڵ و حاڵ کردووە و تاکو ئێستا زیانەکان بە بە ٣٥ ملیار دۆلار لەلایەن حەیدەر عەبادی سەرۆک وەزیرانی عیراقەوە خەمڵێندراون.
رێکخراوی داعش لە ساڵی رابردووەوە پاشەکشێ دەکات و لە ئێستادا رووبەڕووی هێرشێکی هێزە عیراقییەکان دەبێتەوە کە لەلایەن ویلایەتە یەکگرتووەکان و هاوپەیمانانەوە پشتیوانی دەکرێت. داعش لە موسڵ شەڕی مانەوە لە عیراقدا دەکات و دوایین ناوچەیە کە لەو وڵاتەدا لە ژێر دەستیدایە.
بەڕێوەبەرەکەی بانکی نێودەوڵەتی لە رۆژهەڵاتی ناوەڕاست وتی کە سامانی دەوڵەمەندی عیراق لە رووی نەوت و غازەوە، گەرەنتییەکی بەهێزە بۆ دڵنیابوون لە دانەوەی قەرزەکە.
“عیراق یەکێکە لە دەوڵەمەندترین وڵاتانی سەر رووی زەوی. عیراق ویستێکی زۆر و توانای دانەوەی قەرزەکانی هەیە” بەلهاج وایوت.
Kurdish