(ئەلكسەندەر تیكا چۆف) وەزیری كشتوكاڵی روسیا پێشبینی دەكات، بەهای هەناردەی بەروبومە كشتوكاڵیەكان، تاوەكو كۆتایی ئەمساڵ بگاتە 15 ملیار دۆلار.
(تیكاچۆف) راشیگەیاند، لەئێستادا پەیكەربەندی هاوردە‌و هەناردەكردنی بەرهەمە كشتوكاڵیەكان گۆڕانێكی گەورەی بەسەردا هاتووە، بەجۆرێك پێش 3 ساڵ بەهای هەناردەكانمان 10 ملیار دۆلار بوو، بەڵام پێشبینی دەكرێت لەماوەی ئەمساڵدا بەبڕی 15 ملیار دۆلار بەروبومی كشتوكاڵی هەناردەی دەرەوە بكەین.
لە هەمان كاتدا، روسیا هاوردەكردنی ئەو بەروبومانەی كەمكردۆتەوە‌و وەك پێشبینی دەكرێت، تاوەكو كۆتایی ئەمساڵ بگاتە 20 ملیار دۆلار، ئەوە لەكاتێكدایە كە 3 ساڵ لەمەوبەر بەبڕی 40 ملیار دۆلار بەروبومی كشتوكاڵی هاوردەی ڕوسیا دەكرا.
وەزیری كشتوكاڵی روسیا ئاماژەی بەوەشكردوە، كە بەرهەمهێنانی دانەوێڵە ماوەی دوو ساڵە بەڕێژەیەكی بەرچاو زیادیكردوە‌و چاوەڕوانیش دەكرێت ئەمساڵ 35 بۆ 40 ملیۆن تۆن دانەوێڵە هەناردەی دەرەوە بكەن، چونكە دابەزینی بەهای ڕۆبڵ لەبەرامبەر دۆلاری ئەمریكی، بوەتەهۆی ئەوەی كە دانەوێڵەی روسی لە بازاڕەكانی جیهاندا، كێبڕكێی بەرهەمی وڵاتانی دیكە بكات.
Kurdish