بۆ دابەشکردنی زەوی بەسەر کرێنشینان و فەرمانبەران وەزارەتی شارەوانی چاوەڕوانی کوژاندنەوەی بەشێک لە زەوییە کشتوکاڵییەکان و دوایین رێنماییەکانی ئەنجوومەنی وەزیران دەکات.
بەپێی داتاکانی وەزارەتی شارەوانی ئێستا ئەو وەزارەتە بۆ دابەشکردنی زەوی بەسەر فەرمانبەران و کرێنشینان پێویستی بە نزیکەی 150 هەزار پارچە زەویی لە سەرتاسەری هەرێمی کوردستان هەیە.
لە 9ی ئەم مانگەدا ئەنجوومەنی وەزیران داوای لە وەزیری کشتوکاڵ کردووە بە کوژاندنەوە و تەرخان کردنی زەوی کشتوکاڵی رازی بێت، وەزارەتی کشتوکاڵیش رەزامەندی لەسەر ئەو زەوییانە داوە کە بەردەڵانن و بە کەڵکی کشتوکاڵ نایەن.
نەورۆز مەولوود، وەزیری شارەوانی و گەشتوگوزاری حكومەتی هەرێمی كوردستان رایگه‌یاند “تاوەکو ئێستا نەگەیشتوینەتە قۆناخی ئەوەی کە وەزارەتی کشتوکاڵ زەوی رادەستمان نەکردبێت یاخود بەربەستی دروست کردبێت، چونکە هەندێک شوێن زەوییان ئامادەیە و کێشەیان نییە لەگەڵ کشتوکاڵ، بەڵام ئەوەی ئێمە ئێستا چاوەڕێی دەکەین رێنماییەکانی کۆتاییە لە ئەنجوومەنی وەزیرانەوە بەدەستمان بگات”.
عەبدولستار مەجید، وەزیری کشتوکاڵ و سەرچاوە ئاوییەکان رایگەیاند “زەوی بەردەڵانمان هەیە دەتوانین دابینی بکەین، واتە ئەو زەویانەی کە بەکەڵکی کشتوکاڵ نایەن. لەهەمان کاتدا هەرکاتێک زۆر پێویست بێت ئێمە ئەو کاتە کوژاندنەوە بۆ زەوی کشتوکاڵی دەکەین”.
ماوەی چەند مانگێکە فۆڕمی دابەشکردنی زەوی بەسەر فەرمانبەران و کرێنشینان دابەشکراوە، بەپێی داتاکانی وەزارەتی شارەوانی تاوەکو ئێستا زیاتر لە 296 هەزار فۆڕم دابەشکراوە، لەو رێژەیەش نزیکەی 55 هەزار کەسیان کرێنشینن.
Kurdish