چوونەدەرەوەی بەریتانیا لە ئەوروپا بۆ ئابووريی جیهان دەبێتە شۆک

سەرکردەکانی G20 رایدەگەیێنن، چوونە دەرەوەی بەریتانیا لە یەکێتی ئەوروپا، نەک بۆ یەکێتی ئەوروپا، بەڵکو بۆ ئابووریی جیهانی دەبێتە شۆک.



لە کۆبوونەوەی وەزیرانی دارایی و ئابووری وڵاتانی ئەندام لە گرووپی G20 لە شاری شەنگهای چین، بەشێک لە کۆبوونەوەکان تایبەت کران بە قسەکردن لەسەر ئەگەری چوونە دەرەوەی بەریتانیا لە یەکێتی ئەوروپا و کاریگەرییەکانی لەسەر ئابووریی یەکێتی ئەوروپا و جیهان



جۆرج ئۆزبۆرن، وەزیری گەنجینەی بەریتانیا رایگەیاند، ئەو گشتپرسییەی لە بەریتانیا بۆ  بڕیاردان لەسەر چوونەدەرەوەی بەریتانیا رێکدەخرێت، مەترسیدارە. 



وەزیری گەنجینەی ئەمریکاش دەڵێت “مانەوەی بەریتانیا لە بەرژەوەندی نەک تانیا ئابووریی جیهان و یەکێتی ئەوروپادایە، بەڵکو لە بەرژەوەندی ئاسایشی جیهانیشدایە”.



بەڵام بەشێک لە بەرپرسە بەریتانییەکان دەڵێن ئەو نیگەرانییەی سەرکردەکانی بەشداربووی کۆبوونەوەی G20  بێمانایە، چونکە پرسی ئابووری جیهانی و بەتایبەت کارەکانی ئەو گرووپە پەیوەست نییە بە بەریتانیا و یەکێتی ئەوروپاوە، جگە لەوەش 15 ئەندامی ئەو گرووپە لە دەرەوەی یەکێتی ئەوروپان و تەنیا پێنج ئەندام لەناو ئەو یەکێتییەدان. 



نایجڵ فاراژ، سەرۆکی پارتی سەربەخۆیی بەریتانیا، ئەو روونکردنەوەی ئەندامانی G20  تەنیا وەک هاوکارییەک بۆ دەیڤید کامیرۆن و کارەکانی دەزانێت کە دەیەوێت لەناو یەکێتی ئەوروپا بمێنیتەوە، ئەگینا پرسی چوونە دەرەوەی بەریتانیا لە یەکێتی ئەوروپا بڕیارێکی نێوخۆییە و پێویست ناکات ئەو گرووپە پێشنیازی لەو جۆرە بۆ بەریتانیا بکەن. کاری ئەوانیش تەنیا بازرگانیکردنی گەورە و پشتیوانکردنە لە یەکدی، بۆیە هیچ کاریگەرییەکیشی لەسەر دەنگی خەڵکی بەریتانیا نابێت.