وەزیری نەوتی ئێران رایگەیاند، پشتگیری لە هەر جۆرە گفتوگۆیەک دەکەن کە لەسەر نرخی نەوت بکرێت.
بێژەن زەنگەنە، وەزیری نەوتی ئێران رایگەیاند، ”ئێران پشتگیری لە هەر جۆرە دانوستاندن و گفتوگۆیەک دەکات لەگەڵ وڵاتانی ئەندامی ئۆپێک کە سەبارەت بە نرخی نەوت ئەنجامبدرێت’’.
زەنگەنە ئامادەیی ئێرانیشی نیشاندا بۆ گفتوگۆکردن لەگەڵ سعودیە بۆ دیاریکردنی سنوورێک بۆ دابەزینی نرخی نەوت و گوتی’’وڵاتانی ئەندام لە ئۆپێک پێویستیان بە هاوکاریکردنی یەکدی هەیە و ئێمە ئامادەین لەگەڵ سەرجەمیان گفتوگۆ بکەین و لە نێویشیاندا سعودیە”.
رۆژی سێشەممە 9-2-2016 ئیلۆ گیۆ دێل بێنۆ، وەزیری نەوتی ڤەنزوێلا، لەگەڵ عەلی نعێمی، هاوتا سعودییەکەی کۆبووەوە. سەردانەكەش لە چوارچێوەی هەوڵی ڤەنزوێلا دێت بۆ رازیکردنی وڵاتانی ئەندام لە ئۆپێک و هەروەها وڵاتانی دەرەوەی ئەو رێکخراوە بە سازدانی كۆبوونەوەی نائاسایی، بەمەبەستی کەمکردنەوەی بڕی نەوتی بەرهەمهێنراو لە بازاڕەکانی جیهان، بە ئامانجی بەرزکردنەوەی نرخی نەوت.
Kurdish