دوای ئەوەی دوێنێ سێ شەممە، كۆمپانیای داناغاز داوای 11 ملیار دۆلاری لە حكومەتی هەرێم كرد، وەزارەتی سامانە سروشتییەكانی حكومەتی هەرێمی كوردستان وڵامی كۆمپانیای دانا غاز دەداتەوە و رایدەگەیەنێت، ئەوەی كۆمپانیاكە داوای دەكات بنەمای نییە و بۆ چەواشەكارییە.
وەزارەتی سامەنە سرووشتییەكان لە ماڵپەڕی فەرمی وەزارەتەكەیدا راگەیێندراوێكی بە زمانی ئینگلیزی بڵاوكردووەتەوە و باسی لەوەكردووە، ئەوەی كۆمپانیاكە داوای دەكات خەونە و بنەمایەكی نییە.
بەپێی راگەیەندراوەكە، كە لە چوار خاڵ پێكهاتووە، ئاماژە بەوەكراوە، بەهۆی كەمتەرخەمییەكانی دانا غازەوە حكومەتی هەرێم زیانی زۆری پێگەیشتووە و رەتیشیكردۆتەوە، كە حكومەت نەیەوێت كێڵگەكانی پێشبخات.
رۆژی 22 مانگی رابردوو بەپێی بڕیاری دادگای لەندەن بۆ پرسە نێودەوڵەتییەكان بڕی 100 ملیۆن دۆلار سزای حكومەتی هەرێم بۆ بەرژەوەندی كۆمپانیاكە درا و هەفتەیەك دوای ئەوەیش سزاكە بوو بە دوو ملیار دۆلار، بەڵام حكومەتی هەرێم رەتیكردەوە.
Kurdish