له شارى له‌نده‌ن كۆنفرانسى ئابورى بریتانى عێراقی به‌سترا كه تیایدا شاندى ئابورى و بازرگانى هه‌رێمى كوردستان به سه‌رۆكایه‌تى دكتۆر دارا جلیل خه‌یات سه‌رۆكى یه‌كێتى ژووره‌كانى بازرگانى و پیشه‌سازى هه‌رێمى كوردستان و سیروان محەمەد سەرۆکی ژووری بازرگانی و پیشەسازی سلێمانی به‌شداربوون .
سیروان محەمەد سەرۆکی ژووری بازرگانی و پیشەسازی سلێمانی ڕایگەیاند له‌م كۆنفرانسه باسى پته‌وكردنى په‌یوه‌ندیه ئابوریه‌كانى نێوان به‌ریتانیا و عێراق و هه‌رێمى كوردستان و ئه‌و ئاسته‌نگانه‌ى دێنه به‌رده‌مى پرۆسه‌ى ئابورى عێراق و هه‌رێمى كوردستان كرا، له هه‌مان كاتدا گفتوگۆ كرا بۆ دۆزینه‌وه‌ى ئه‌و رێگا چارانه‌ى كه پێویستن بۆ چاره‌سه‌ركردنى كێشه ئابورى و بازرگانیه‌كان،ئه‌م كۆنفرانسه له‌لایان ( بارۆنا نیكلسون ) سه‌رۆكى رێكخراوى ( IBBC) سه‌رپه‌رشتى ده‌كرا و تیایدا باڵوێزى عێراق له به‌ریتانیا و كاروان جمال نوێنه‌رى حكومه‌تى هه‌رێمى كوردستان له به‌ریتانیا و ژماره‌یه‌كى زۆرى بازرگانان و خاوه‌نكاران به‌شدار بوون.
له هه‌مان رۆژدا له په‌راوێزى كۆنفرانسى ئابورى بریتانى عێراقی له‌لایان ( بارۆنا نیكلسون ) سه‌رۆكى رێكخراوى ( IBBC) ئێواره خوانێك بۆ شاندى ئابوورى و بازرگانى هه‌رێمى كوردستان رێكخرا، له‌م ئێواره خوانه دا كاروان جمال نوێنه‌رى حكومه‌تى هه‌رێمى كوردستان له به‌ریتانیا ووتارێكى پێشكه‌ش كرد كه تیایدا به‌خێرهاتنى شاندى ئابوورى هه‌رێمى كرد دواى ئه‌ویش دكتۆر دارا جلیل خه‌یات سه‌رۆكى یه‌كێتى ژووره‌كانى بازرگانى و پیشه‌سازى هه‌رێمى كوردستان كه تیایدا باسى رۆلى كۆمپانیا به‌ریتانیه‌كانى كرد كه ئێستا له هه‌رێمى كوردستان كار ده‌كه‌ن هانى كۆمپانیا به‌ریتانیه‌كانى دا بۆ ئه‌وه‌ى بێن له هه‌رێمى كوردستان كاربكه‌ن، هه‌روه‌ها باسى كۆنفرانسى داهاتووى كرد كه تایبه‌ت ده‌بى به پرۆسه‌ى ئابوورى هه‌رێمى كوردستان كه بریار وایه ساڵى داهاتوو له شارى له‌نده‌ن ببسترێ، له رۆژى دووه‌مى كۆنفرانسیش شاندى هه‌رێم به‌شدارى كۆنفرانسه‌كه بوون.
Kurdish