له‌مه‌رزی باشماخی نێوده‌وڵه‌تی ده‌ست به‌سه‌ر 116 ئامێری په‌یوه‌ندیكردنی (هۆكی تۆكی)دا ده‌گیرێ، هه‌مو ئامێره‌كانیش له‌نێوان وه‌زاره‌تی پێشمه‌رگه‌‌و ئاسایش‌و به‌رپرسی به‌شه‌كانی ده‌روازه‌ی باشماخدا دابه‌شده‌كرێن.
به‌ڕێوه‌به‌ری گومرگی باشماخی نێوده‌وڵه‌تی مه‌حمود ئه‌حمه‌د بە ئاوێنەی راگەیاندوە: دوای ئه‌وه‌ی ده‌ست به‌سه‌ر ئه‌و ئامێرانه‌دا گیراوه، خاوه‌نه‌كه‌ی وتویه‌تی “نه‌مزانیوه قه‌ده‌غه‌یه بۆیه له‌لایه‌نی په‌یوه‌ندیداره‌وه نوسراوی هێناوه وتویه‌تی ده‌یبه‌خشمه هێزی پێشمه‌رگه، ئێمه‌ش به‌نوسراوی فه‌رمی كاره‌كه‌مان ڕایی كردوه”.
له‌لایه‌كی تره‌وه به‌رپرسی ده‌روازه‌ی مه‌رزی باشماخی نێوده‌وڵه‌تی رۆستم مه‌حمود ئاماژه به‌وه ده‌كات، ئه‌و هاوڵاتیه له‌دڵسۆزیی خۆیه‌وه ئامێره‌كانی نه‌به‌خشیوه، به‌ڵكو دوای ئه‌وه‌ی ده‌ستی به‌سه‌ردا گیراوه، وتویه‌تی ده‌یبه‌خشمه هێزی پێشمه‌رگه.
هه‌روه‌ها ئه‌و به‌رپرسه‌ی ده‌روازه‌ی باشماخ ئه‌وه‌شی ئاشكراكرد ئه‌و ئامێرانه به‌نوسراوی فه‌رمی 50 بۆ ئاسایش بوه، 66ی بۆ وه‌زه‌راتی پێشمه‌رگه بوه، ئه‌و ره‌تیشیكرده‌وه كه 5ئامێری به‌سه‌ر پاسه‌وانه‌كانی خۆیدا دابه‌شكردبێت‌و وتی “من داوام له‌وه‌زاره‌تی پێشمه‌رگه كردوه 5دانه‌ی بداته ئێمه بۆ په‌یوه‌ندیكردنی به‌رپرسی به‌شه‌كانی مه‌رزه‌كه، نه‌ك پاسه‌وانه‌كانم، ئه‌وانیش ره‌زامه‌ندییان ده‌ربڕیوه بۆ زانیاریتان تائێستاش ئه‌و ئامێرانه‌م وه‌رنه‌گرتوه”.
Kurdish