له دیدارێكدا له‌نێوان ساماڵ سه‌ردار وه‌زیری بازرگانی و پیشه‌سازی هه‌رێمی كوردستان له‌گه‌ڵ شاندێكی حكوومی و كه‌رتی تایبه‌تی وڵاتی بیلارووسیا كه پێكهاتبوو له ڤلادیمێر ماكای وه‌زیری ده‌ره‌وه‌ی ئه‌و وڵاته و ئه‌ندرێ ساڤینیغ باڵیۆزی بیلارووسیا بۆ كاروباری توركیا و عێراق و نوێنه‌رانی كه‌رتی پیشه‌سازی ئه‌و وڵاته، باس له دانانی نه‌خشه ڕێیه‌ك بۆ چۆنییه‌تی هاوكاری و هه‌ماهه‌نگی له‌نێوان هه‌رێمی كوردستان و وڵاتی بیلارووسیا به ئامانجی بووژانه‌وه و بنیاتنانه‌وه‌ی كه‌رتی پیشه‌سازی له هه‌رێمی كوردستان كرا، چونكه هه‌رێمی كوردستان كه‌شێكی له‌باری هه‌یه بۆ وه‌به‌رهێنان له‌ڕووی پیشه‌سازییه‌وه .
وه‌زیری بازرگانی و پیشه‌سازی ئاماده‌یی هه‌رێمی كوردستانی نیشاندا بۆ ئه‌نجامدانی چه‌ند پرۆژه‌یه‌كی هاوبه‌ش له‌نێوان هه‌ردوولا له بواری پیشه‌سازی و له‌ڕێگه‌ی كه‌رتی تایبه‌ت ، هاوكات وه‌زیری ده‌ره‌وه‌ی بیلارووسیا تیشكی خسته‌سه‌ر هه‌وڵه‌كانیان بۆ به‌هێزكردنی په‌یوه‌ندییه‌كانیان له‌گه‌ڵ هه‌رێمی كوردستان له ڕِێگای كردنه‌وه‌ی كونسوڵگه‌ری وڵاته‌كه‌یان له هه‌رێمی كوردستان و دامه‌زراندن و كردنه‌وه‌ی هێڵی ئاسمانی راسته‌وخۆ له‌نێوان هه‌ردوولادا، هاوكات ئاسانكاری بۆ پێدانی ڤیزه به پیاوانی كاری هه‌رێمی كوردستان و بڕیاریشه كۆمپانیاكانی بیلارووسیا له ئاینده‌دا به‌شداری له پێشانگا نێوده‌وڵه‌تییه‌كانی هه‌رێمی كوردستان بكه‌ن، له كۆتاییدا هه‌ردوولا جه‌ختیان له‌سه‌ر ڕێكخستن و به‌ستنی كۆنفڕانسی هاوبه‌شی ئابووری كرده‌وه بۆ كۆمپانیاكانی كه‌رتی تایبه‌ت به ئامانجی ئه‌نجامدانی كاری هاوبه‌ش له‌نێوانیاندا.
Kurdish