هەماهەنگكاری بان كی مۆن ، سكرتێری گشتی نەتەوەیەكگرتووەكان لە عیراق، سوپاسی حكومەتی هەرێمی كوردستان و خەڵكی كوردستان دەكات بۆ لە خۆگرتنی ئاوارەكان و هاوكاریكردنیان و داواش لە رێكخراوەكانی UN دەكات بەجدی كاربكەن لەگەڵ حكومەتی هەرێم بۆدروستكردنی كەمپی ئاوارەكان ، گواستنەوەی ئەو ئاوارانەی لەنێو خوێندنگەكاندان بۆ ئەوەی كێشە لەبەردەم دەستپێكردنی خوێندندا دروست نەبێت.
ئەمڕۆ 7ی ئەیلولی 2014، بەهرۆز محەمەد ساڵح پارێزگاری سلێمانی پێشوازیكرد لە كیڤن كەنەدی ، هەماهەنگكاری كاروباری مرۆی بانكی مۆن سكرتێری گشتی نەتەوە یەكگرتووەكان لە عیراق و وەفدێكی هاورێی كە پێكهاتبوون لە بەرپرسی سلێمانیUNHCR و WHO و ئۆفیسی ئۆچا لە سلێمانی و راوێژكاری هەرێمی USAID.
لە سەرەتای دیدارەدا كیڤن كەنەدی ، هەماهەنگكاری كاروباری مرۆی بانكی مۆن سكرتێری گشتی نەتەوە یەكگرتووەكان ئاماژەی بۆ ئامانجی سەردانەكەیان كردوو رایانگەیاند ، ئامانجی سەردانەكەیان بۆ سلێمانی لە نزیكەوە ئاگاداربوونە لە پێداویستییەكانی ئاوارەكان لە سلێمانی هاوكاری كردنی حكومەتی هەرێم لەو رووە.
هەماهەنگكاری بان كی مۆن ، سوپاسی دەستخۆشی لە سیاسەتی حكومەتی هەرێمی كوردستان و میوانداری هاووڵاتیانی كوردستانی كرد بەرامبەر ئاوارەكان و رایگەیاند نەتەوەیەكگرتووەكان لە هەوڵدادەبێت بۆ زیاتر بە هاناوە چوونی ئاوارەكان و كەمكردنەوەی ئەو نیگەرانییەی حكومەتی هەرێمی كوردستان هەیەتی لەو بارەیەوە.
لەو رووەشەوە ئاماژەی بە كردنەوەی ئۆفیسی ئۆچا كرد لەسلێمانی كە لەئێستا بەدواوە دەست بەكاردەبێت بۆ هەماهەنگی زیاتر لەنێوان حكومەتی هەرێمی كوردستان و رێكخراوەكانی سەر بە نەتەوەیەكگرتووەكان و رێكخراوە ناحكومییەكان.
لە وتەیەكیشدا پارێزگاری سلێمانی ئاماژەی بە ژمارەی ئاوارەكان كرد لە سنوری پارێزگای سلێمانی و رایگەیاند لە دوای رووداوەكانی موسڵەوە تا كۆتای مانگی ئاب، 171 هەزار ئاوارە روویان لە سلێمانی كردووە كە زۆربەیان كوردانی ئێزدی و شەبەك و مەسیحین.
پارێزگار نیگەرانی خۆیشی لە میكانیزمی كاركردنی نەتەوەیەكگرتووەكان بەرامبەر ئاوارەكان نەشاردەوەو ” داوای كرد سیاسەتێكی یەكگرتوو لە سەرانسەری هەرێمی كوردستان پەیڕەو بكەن”
پارێزگار وتیشی: هاوكارییەكان بۆ ئاوارەكان كەمە و سیستماتیك نییەو بۆیە وەك حكومەتی هەرێم زیاتر پشتیان بە هاوكاری خەڵك و وڵاتانی دراوسێ بەستووە ، بەڵام خەڵكیش بە هۆی قەیرانی داراییەوە توانای هاوكاری لاواز بووە.
هەورەك پارێزگار نیگەرانی خۆی لە بەرنامەی كۆچ و كۆچبەرانی عیراق دەربڕی و رایگەیاند تا ئێستا هاوكارییەكانی ئەو وەزارەتە وەك پێویست نییە و بەرچاویان روون نییە كە ئەو وەزارەتە دەتوانێت چی بۆ ئاوارەكان بكات.
سەبارەت بەو بڕە پارەی كە بۆ ئاوارەكانی تەرخانكراوە پارێزگار رایگەیاند پرۆسەكە لەژێرچاودێری و هەماهەنگی لایەنە پەیوەندیدارەكانی حكومەتی هەرێم بەرێوەدەچێت تا ئێستا لە سنوری سلێمانی زیاتر لە 9 هەزار خێران ئەو هاوكارییەیان پێ دراوە.
پارێزگار ئاماژەی بۆ ئەوە كرد ئەوەی ئیدارەی سلێمانی توانیوویەتی بۆ ئاوارەكانی بكات وەك قۆناغی یەكەم نیشتەجێكردنیان بووە لە شوێنكی گونجاو و دابینكردنی خۆراك بۆیان ، بەڵام ئاوارەكان جگەلەو پێداویستیانە كێشەی تریان زۆرە، لەوانە كێشەی ئیداری و كێشەی تەندروستی و كێشەی خوێندن و كێشەی نەبوونی پارەو كار.
بۆیە پارێزگار داوای كرد نەتەوەیەكگرتووەكان بۆ چارەسەری تر بگەرێن و هەوڵ بدەن ئاوارەكان بگەرێنەوە و شوێن و جێگەی خۆیان و ئارامی ناوچەكەیان بپارێزن
پارێزگار تەئكیدی كردووە دەبێت شێرپەنجەی تیرۆر بنەبڕ بكرێت ، چونكە مەترسی بۆ سەر ئەو ناوچە ئارامانەش هەیە كە ئێستا ئاوارەكان روویان تێ كردووە.
لە كۆبوونەوەكەدا سەبارەت بە دروستكردنی كەمپەكان و چۆڵكردنی خوێندنگەكان بەهۆی نزیك بوونەوەی وەرزی خوێندن ، هەماهەنگكاری بان كی مۆن لە عیراق داوای لە رێكخراوی UNHCR كرد” بەجدی كار بكەن لەگەڵ حكومەتی هەرێم بۆ ئەوەی بەزووترین كات ئاوارەكان بگوازرێنەوە بۆ كەمپەكان یان رێوشوێنی تر بگرنە بەر بۆ نیشتەجێكردنی ئاوارەكان تا ئەو كاتەی كەمپەكان تەواو دەبن.”
هەر سەربارەت بە كەمپەكان بەپرسی UNHCR لە سلێمانی رایگەیاند” گرێبەستی دروستكردنی هەردوو كەمپی چەمچەماڵ و كەلار واژۆ كراوە لە كۆتای مانگی 10دا قۆناغی یەكەمی تەواو دەبێت و ئامادە دەبێت بۆ لەخۆگرتنی ئاوارەكان”
هەر لە كۆبوونەوەكەدا راوێژكاری هەرێمی ئاژانسی ئەمریكی بۆ گەشەپێدانی نێودەوڵەتی USAID، رایگەیاند “زۆر جێگەی سەرنج و مایەی شانازییە حكومەتی هەرێمی سەرەڕای ئەو قەیرانە داراییەی تێی كەوتووە وەڵامدانەوەی بۆ پێشوازكردن لە ئاوارەكان هەبووە”
وتیشی” ئێمە لێرەین بۆ هەر هاوكارییەك كە پێویستانە”
ز.ر
Kurdish