نرخی پاسەكانی گواستنەوەی هاوڵاتیان لە شاری سلێمانی كرایەوە بە 500 دینار و بڕیاردرا لە پێدان و دابینكردنی سوتەمەنیدا هاوكاری پێویست پێشكەش بە شۆفێرانی ئەو هێڵانە بكرێت بۆ ئەوەی نرخ لەسەر هاوڵاتیان زیاد نەكرێت ,
ئەمەش دوای ئەوەدێت كە بەهۆی ئەو قەیرانی سوتەمەنیەی سەری هەڵداوە نرخی هەندێك لە هێڵەكانی پاس لە شاری سلێمانی كرایە (750) دینار.
پەیوەست بەم لایەنەو بەمەبەستی لە نزیكەوە ئاگاداربوون لەو گرفتانەی كە سەریان هەڵداوە و دۆزینەوەی چارەسەری پێویست بۆیان ئاوات محەمەد قائیمقامی سلێمانی لەگەڵ لێپسراوی هێلەكانی پاس و سەندیكای شۆفێرانی سلێمانی دا كۆبوویەوە و پاش تاوتوێكردنی گرفتەكان و ئەو قەیرانی سوتەمەنیەی كە رووی لە هەرێمی كوردستان كردووە و كاریگەری زۆری كردووە سەر كاروباری زۆربەی هاوڵاتیان بە تایبەتی شۆفێرانی هێڵەكانی گواستنەوە بڕیاردرا كە حكومەت هاوكاری پێویستیان پێشكەش بكات ,
لە كۆبوونەوەكەدا قائیمقامی سلێمانی رایگەیاند هێڵەكانی گواستنەوە ئەركێكی گرنگیان لە ئەستۆدایە و بەپێویستی دەزانن لە چوارچێوەی داكۆكی كردن لە بەرژەوەندی گشتیدا هاوكاری و كارئاسانیان پێشكەش بكەن, راشیگەیاند وەك گرتنەبری رێگە چارەیەكی كاتی تا ئەو كاتەی چارسەرێك بۆ قەیرانەكە دەدۆزرێتەوە رۆژانە بڕی 30 لیتر بەنزین بۆ ئەو پاسانە دابین بكرێت كە كارتی هێڵیان هەیە و هەروەها پێدانی گازوەیلیش هاوشێوەی پێشوو بێت , پاشان بڕیاردرا كە نرخی گواستنەوەی پاسەكانی شاری سلێمانی بكرێتەوە بە 500 دینار و لە دابین كردنی سوتەمەنیشدا هاوكاری پێویستیان بۆ بكرێت.
Kurdish