قائیمقامى سلێمانى لەگەڵ بازرگانانى هاوردەکردنى برنج کۆبۆوە

ئەو بازرگانانەى برنج هاوردە دەکەن دەتوانن دواى وەرگرتنى سامپل بارەکانیان هاوردەى شارى سلێمانى بکەن و دواى دەرچوونى ئەنجامى تاقیگەیى ئەتوانن مامەڵەى فرۆشتنى پێوە بکەن .

ئاوات محەمەد قائیمقامى سلێمانى لەگەڵ بازرگانەکانى هاوردەکردنى برنج و لەگەڵ نوێنەرانى بەرێوەبرایەتییەکانى( تەندروستى سلێمانى ، کولیتى کۆنترول و چاودێرى بازرگانى ) کۆبۆوە.

سەبارەت بەو بارە برنجانەى کە لە مەرزى باشماخەوە هاوردە دەکرێن ئاوات محەمەد رایگەیاند لەمەودوا ئەتوانرێت دواى وەرگرتنى سامپل بهێنرێتە ناوەوە و پاش دەرچوونى ئەنجامى پشکنینى تاقیگەیى بخرێتە بازارەوە ئەم مامەڵەیەش تەنها لەگەڵ ئەو کۆمپانیایانەدا بکرێت کە لە لایەن ژوورى بازرگانى سلێمانیەوە پشتگیرى لێکراون .

لە بەشێکى ترى کۆبوونەوەکەشدا ئاوات محەمەد ئاماژەى بۆ ئەوەش کرد کە لە داهاتوویەکى نزیکدا بە هەماهەنگى لەگەڵ بەرێوەبەرایەتى تەندروستى و ڤیترنەرى بە رەچاوکردنى ستانداردى جیهانى پێداچوونەوە ئەکرێت بە چۆنییەتى میکانیزمى وەرگرتنى سامپل بۆ ئەو بارانەى کە هاوردە دەکرێت.

سەرۆکى ژورى بازرگانى و پیشەسازى سلێمانى سیروان محەمەد کە لەکۆبونەوەکەدا بەشداربوو ڕایگەیاند کەئەوە بڕیارێکى گونجاوە بۆ بازگانانى برنج و ئێمەش پشتیوانى لێدەکەین و کاردەکەین بۆسەرخستنى ئەو بڕیارە.

ز.ر