بەڕێوەبەرایەتی باجی هەرێمی كوردستان رایدەگەیەنێت، زۆربەی كۆمپانیاكان بۆ ئەوەی باج نەدەن، داهاتی راستەقینەی خۆیان ئاشكرا ناكەن‌و لەبری قازانج، زەرەر نیشان دەدەن.
زانیار محەمەد قادر بەڕێوەبەری گشتیی باجی هەرێمی كوردستان بۆ ئاژانسی ئەنادۆڵ وتی:»نزیكەی 20 هەزار كۆمپانیا لەهەرێمی كوردستان بەڕەسمی كار دەكەن، بەڵام تائێستا 14 هەزاریان لەباج تۆمار كراون».
بەڕێوەبەری گشتیی باجی هەرێمی كوردستان ئاماژە بەوە دەكات، (95%)ی بودجەی كارگەو كۆمپانیاكان راست نین‌و بەجۆرێك دایدەنێن كە لەبری قازانج، زەرەریان كردبێ، تا باج نەدەن.
سەبارەت بەشەفافییەت لەبارەی داهاتی باجەوە، بەڕێوەبەری گشتیی باجی هەرێم وتی:»داهاتی باجەكان روونەو ژمارەكەی بەو شێوەیە نییە كە زۆر جار لەمیدیاكان باسی لێوە دەكرێ، بەشێوەیەك داهاتی یەك ساڵی باج تەنیا بەئەندازەی یەك مانگی بودجەی پەروەردەیە، كە دەكاتە نزیكەی 160 ملیار دینار، ئەو پارەیە ناتوانێت كورتهێنانی پێ پڕ بكرێتەوە».
زانیار مەحمەد قادر لەبارەی ئەگەری زیادكردنی باجەكان وتی:»هەرچەندە ئێستا هەرێم لەلایەن بەغداوە رووبەڕووی ئابڵوقەی ئابووری بۆتەوە، بەڵام جارێ باج زیاد ناكرێ‌و ئەو باجەش بە بەغدا نادەین. ئێمە داهاتەكە لەخەڵكی خۆمان وەردەگرین، چۆن دەكرێ بە بەغدای بدەین، ئەو پارەیە دەچێتە ناو حیسابێكی داخراو و ناتوانری لێی دەربهێنرێ».
لەكۆتایی لێدوانەكەیدا ئاماژەی بەوە كرد، بەهۆی ئەوەی پارەی پێشمەرگە لە بەغداوە نەهاتووە، داهاتی باج بۆ ئەوان بەكاردەهێنرێ. «هەندێ جاریش رووداوی لەناكاو روو دەدات، ئەو داهاتە بۆ قەرەبووكردنەوەی خەڵك بەكار دەهێنرێ». ئەو وایوت.
كوردستانی نوێ
Kurdish