وەزارەتی بازرگانی دەڵێ شتی وا نییە

خراپیی کوالیتیی برنجی بایەع وای لە هاووڵاتیانی هەرێمی کوردستان کردووە، ئەو برنجە لە بریکارەکانی خۆراک وەربگرن و بە نرخێکی کەم بیفرۆشنەوە، هەندێک لە بازرگانانیش ئەو برنجە دەکڕن و بەرەو تورکیای دەبەن، لەو وڵاتەش لە رێگەی ئامێرەوە دەهاڕدرێت و دواتر پان و درێژ دەکرێتەوە و لەگەڵ تێکەڵکردنی هەندێک ماددە کە تامی برنجەکە خۆش دەکات، لەناو کیسەی جوان و بە کوالیتی برنجی دەنک درێژی بەسمەتیی 13 ملیم، بۆ هەرێمی کوردستان دەگەڕێتەوە. 

بازرگانێکی ئەو کارە کە نەیویست ناوی ئاشکرا بکرێت، بۆ (باس) رای گەیاند، ئەوان لێرە ئەو برنجە لە هاووڵاتیان دەکڕن و بۆ تورکیای دەنێرن، زانیاریی تەواویان هەیە کە ئەو برنجانەی بۆ کوردستان لەو وڵاتەوە دێنەوە هەمان ئەو برنجە بایەعەن و دوای لەئامێردان و دەستکاریکردن بە شێوازێکی تر کە وا دیار بێ کوالیتیی باشتر بێ و خستنە ناو زەرفی تایبەت دەگەڕێندرێنەوە بۆ کوردستان”.

ئەو بازرگانە جەختی لەسەر ئەوەش کردەوە، ئەوان بە شێوەیەکی ئاسایی و لە سنوورەکانەوە ئەو برنجە بۆ تورکیا رەوانە دەکەن، گوتیشی: “زۆربەی خێزانەکانی هەرێمی کوردستان ئەو برنجە ناخۆن و بە نرخی هەرزان دەیفرۆشنەوە، چونکە لە رووی کوالیتیەوە خراپە و دەنکەکانی شکاون و تامێکی خۆشی نییە و لێنانیشی زەحمەتە و دەبێتە پەسیسە”.

بەڵام ئەحمەد حسێن وتەبێژی فەرمیی وەزارەتی بازرگانیی حکوومەتی هەرێمی کوردستان، بۆ (باس) ئاماژەی بەوە دا ئەوانە کارێکی نایاسایی دەکەن و ئەگەر لە سنوورەکان بزانرێت ئەو برنجەی لە زەرفدا هاتووە هەمان برنجی بایەعە، ئەوە بە دڵنیاییەوە دەستی بەسەردا دەگرن.

گوتیشی: “لێژنەکانی وەزارەت بەردەوام چاودێریی هەموو سنوورەکان و ناو بازاڕ و شوێنەکانی فرۆشتنی خۆراک دەکات، ئەگەر هەر حاڵەتێکی وا هەبێت، ئەوە درکیان پێکردووە و بەدڵنیاییەوە دەستیان بەسەردا گرتووە”.

هاوکات محەمەد عەباس بەڕێوەبەری چاودێریی بازرگانیی هەولێر بۆ (باس) رەتی کردەوە کە برنجی تایلەندی کە لە بریکارەکانی خۆراکەوە بە هاووڵاتیان دەدرێت، بە برنجی بەسمەتیی هیندی گۆڕابێت و لە زەرفی تایبەتدا لە تورکیا یان هەر شوێنێکی دیکە هاتبێتە بازاڕەکانی کوردستانەوە، گوتیشی: “تەنانەت یەک کیسی واشمان نەبینیوە”.

 

 

 

(باس)