بەپێی دوایین ئاماری وەزارەتی بازرگانی‌و پیشەسازیی هەرێمی كوردستان، زیاتر لە ٢١ هەزار كۆمپانیای جۆراوجۆر لەكوردستان تۆماركراون، كە بەشی هەرە زۆریان كۆمپانیای ناوخۆیین.
بەپێی لێدوانی بەرپرسێكی ئەو وەزارەتە، پەسەندنەكردنی بودجەی عیراق‌و قەیرانە داراییەكەی هەرێم، كاریگەریی لەسەر هاتنی كۆمپانیا بیانییەكان نەبووەو هیچ كۆمپانیایەكیش مایەپوچبوونی رانەگەیاندووە.
(13%)ی كۆمپانیاكان لەكوردستان
دڵزار ئیسماعیل بەڕێوەبەری گشتیی تۆماركردنی كۆمپانیاكان لەوەزارەتی بازرگانی‌و پیشەسازیی هەرێم ئاشكرایكرد، ئەو قەیرانە داراییەی رووبەڕووی هەرێمی كوردستان بۆتەوە، كاریگەریی نەرێنیی لەسەر هاتنی كۆمپانیا بیانییەكان بۆ هەرێم نەبووە، بەجۆرێك هاتنیان لەساڵی ٢٠١٤دا، هاوشێوەی ساڵانی پێشترە. راشیگەیاند، بەمدواییانە كۆمپانیای بەهێزو گەورەی دنیا، روویان كردۆتە هەرێمی كوردستان بۆ سەرمایەگوزاریی.
دڵزار ئیسماعیل بۆ ئاژانسی ئانادۆڵ وتی:»ژمارەی كۆمپانیا تۆماركراوەكان لەكوردستان، زیاتر لە ٢١ هەزار كۆمپانیایە، لەو ژمارەیەش دوو هەزارو ٧٨٠ كۆمپانیایان بیانیین كە دەكاتە (١٣%)ی كۆمپانیاكانی كوردستان».
بەڕێوەبەری گشتیی تۆماركردنی كۆمپانیاكان لەوەزارەتی بازرگانی‌و پیشەسازیی هەرێم روونیكردەوە، ئەو كۆمپانیایانەی لەبواری نەوت‌و غاز لەهەرێم كاردەكەن، دوای رەزامەندی وەزارەتی سامانە سروشتییەكان، لای ئەوان تۆمار دەكرێ‌و ئێستا بەكۆمپانیا ناوخۆییەكانەوە ژمارەیان گەیشتۆتە ٣٠٠ كۆمپانیای نەوت‌و غاز.
كۆمپانیا توركی‌و ئەمریكییەكان
دڵزار ئیسماعیل لەبارەی ئەو كۆمپانیا بیانیانە ئاماژەی بەوەدا، پێشتر كۆمپانیاكانی هەرێم، زیاتر لەو وڵاتانە بوون كە دراوسێی هەرێمن، بەڵام ئێستا زۆرینەی هەرە زۆری وڵاتانی جیهان كۆمپانیایان لەهەرێمدا هەیە.
وتیشی:»كۆمپانیاكانی توركیا لەنێو كۆمپانیا بیانییەكاندا ریزبەندی یەكەمیان هەیەو لەكۆی دوو هەزارو ٧٨٠ كۆمپانیای بیانی، هەزارو ١٨٠یان توركین، كۆمپانیا ئەمریكییەكانیش كە نزیكەی ٦٠ كۆمپانیا دەبن، لەڕیزبەندی پێنجەمدا دێن».
لەكۆتایی قسەكانیدا بەڕێوەبەری گشتیی تۆماری كۆمپانیاكان لەوەزارەتی بازرگانی و پیشەسازیی هەرێم ئاماژەی بۆ ئەوەكرد، پەیوەندییەكانیان لەگەڵ حكومەتی عیراق لەبارەی تۆماری كۆمپانیاكانەوە ئاساییەو وتی:»ساڵی ٢٠٠٦ پرۆتۆكۆلی هاوبەش لەنێوان هەردوولا بۆ تۆماركردنی كۆمپانیاكان هەیە».
كوردستانی نوێ
Kurdish