بەرپرسێكی وەزارەتی بازرگانی ئێران دەڵێت: نزیكەی 600 كۆمپانیای وڵاتەكەی لە عێراق و هەرێمی كوردستان تۆمار كراون و باس لەوەش دەكات ئاستی ئاڵوگۆڕی بازرگانی نێوان ئێران و عێراق 11 ملیار دۆلاری تێپەڕاندووە.
جەهانبەخش سەنجابی شیرازی، بەرپرسی ژوری هاوبەشی بازرگانی ئێران و عێراق، رایگەیاند: 324 كۆمپانیای ئێرانی لە هەرێمی كوردستان و 300 كۆمپانیای تریش لە ناوچەكانی ناوەڕاست و باشوری عێراق تۆمار كراون.
وتیشی: ئاستی ئاڵوگۆڕی بازرگانی ئێران و عێراق لەمساڵدا 11 ملیار و 700 ملیۆن دۆلار بووە، بەنیازن ئەو ئاستە بۆ 15 ملیار دۆلار لە ساڵێكدا بەرزبكەنەوە.
ئەو بەرپرسەی وەزارەتی بازرگانی ئێران هێمای بۆ ئەوەش كرد هەناردەكردنی كاڵای وڵاتەكەی رێژەی 98.5% ی ئاڵوگۆڕی بازرگانی لە گەڵ عێراق پێكدەهێنێت و رێژەی 1.5% ی ئەو 11 ملیار دۆلارە دەگەڕێتەوە بۆ هاوردەكردنی كاڵا لە عێراقەوە.
بەوتەی بەرپرسی ژوری بازرگانی ئێران و عێراق، ئاستی ئاڵوگۆڕی بازرگانی نێوان ئەو دوو وڵاتە لە 9 مانگی رابردوودا بە بەراورد لە گەڵ ساڵی پێشووتر بە رێژەی 18% زیادیكردووە.
Kurdish