به‌هۆی كێشه كه‌ڵه‌كه‌بووه‌كانی ئێستای عیراق و ویستی ده‌وڵه‌تی قانون بۆ سوودوه‌رگرتن له كات، ده‌نگۆی به‌ستنی كۆبوونه‌وه‌ی نیشتمانی له ئارادا نه‌ماوه، په‌رله‌مانتارێكی كوردیش رایده‌گه‌یه‌نێت، گه‌ر به یاساش رێكنه‌خرێت، ئه‌وا مالیكی بۆ جاری سێیه‌م ناتوانێت پۆستی سه‌رۆكی حكومه‌ت وه‌ربگرێته‌وه، چونكه نه‌یتوانی ببێته جێگه‌ی بڕوای لایه‌نه سیاسییه‌كان.
حه‌سه‌ن جیهاد، ئه‌ندامی ئه‌نجومه‌نی نوێنه‌رانی عیراق له‌سه‌ر لیستی هاوپه‌یمانی كوردستان، رایگه‌یاند: “له ئێستادا ده‌نگۆی به‌ستنی كۆبوونه‌وه یان كۆنگره‌ی نیشتمانی له‌سه‌ر گۆڕه‌پانی سیاسی عیراق نه‌ماوه و به‌ره‌وپێشچوون بۆ چاره‌سه‌ری قه‌یرانی سیاسی به‌دی ناكرێت”.
هۆكاره‌كه‌شی بۆ ئه‌و لێدوانه توندانه‌ی مالیكی و ئه‌و هه‌موو كێشانه گه‌ڕانده‌وه كه دووچاری عیراق بوونه‌ته‌وه، روونشیكرده‌وه، پرۆژه‌یاساكانی ژێرخانی ئابووری و لێبووردنی گشتی و كێشه‌ی بانكی ناوه‌ندی و هه‌ڵوه‌شاندنه‌وه‌ی به‌شه‌خۆراكی مانگانه‌ی هاوڵاتییان، رێگرن له‌به‌رده‌م پرۆسه‌ی سیاسی عیراق و به‌ستنی كۆبوونه‌وه‌ی نیشتمانی.
په‌رله‌مانتاره‌كه‌ی هاوپه‌یمانی كوردستان، پێیشیوایه، ئیئتیلافی ده‌وڵه‌تی قانون و خودی مالیكی به‌مه‌به‌ست كێشه دروست ده‌كه‌ن بۆ سوودوه‌رگرتن له كات، وتیشی: “به‌ڕاشكاوانه به عه‌باس به‌یاتی، ئه‌ندامی لیستی ده‌وڵه‌تی قانونم راگه‌یاند، سیاسه‌تی مالیكی سیاسه‌تێكی شكستخواردووه و گه‌ر به‌یاساش ماوه‌ی سه‌رۆكایه‌تییه‌كان دیاری نه‌كرێت، ئه‌وا به‌هیچ شێوه‌یه‌ك جارێكی دیكه مالیكی نابێته‌وه به سه‌رۆك وه‌زیران، چونكه جێی بڕوا نه‌بوو”.
وه‌ك (حه‌سه‌ن جیهاد) ئاماژه‌ی پێدا، له‌كاتی وتوێژكردنی له‌گه‌ڵ ئه‌ندامه‌كه‌ی ده‌وڵه‌تی قانون، ئه‌وه‌شی پێڕاگه‌یاندووه، كه ئه‌وان ده‌یانه‌وێت به دژایه‌تیكردنی كورد له ناوچه دابڕێنراوه‌كان و كه‌ركوك، له هه‌ڵبژاردنه‌كانی داهاتوو ده‌نگی ئه‌و ناوچانه به‌ده‌ست بهێنن.
له‌لایه‌كی دیكه‌وه، ئه‌ندامه‌كه‌ی لیژنه‌ی ئاسایش و به‌رگری، سه‌باره‌ت به ره‌وشی كه‌ركوك و پێكهێنانی ئۆپه‌راسیۆنی دیجله، وتی: “ئه‌مڕۆ دووه‌م ماده‌ی دانیشتنی په‌رله‌مان ته‌رخانكرا بۆ گفتوگۆكردن له‌سه‌ر پێكهێنانی ئۆپه‌راسیۆنی دیجله، زۆر به زه‌قی باسمان له‌وه‌كرد كه ئه‌و هێزه ده‌ستوه‌رده‌داته نێو كاروباری پارێزگاكانه‌وه و ئه‌وه‌ش جێگه‌ی قبوڵی ئێمه نییه، چونكه ئه‌وه عه‌سكه‌رتارییه‌ته و حوكمی مه‌ده‌نی نییه”.
له دانیشتنه‌كه‌دا، ئه‌ندامه‌كه‌ی لیژنه‌ی ئاسایش و به‌رگری، ئه‌وه‌شیخستبووه‌ڕوو، كه هه‌رسێ پارێزگای دیاله‌‌و كه‌ركوك و سه‌ڵاحه‌دین پێكهێنانی ئۆپه‌راسیۆنی دیجله‌یان ره‌تكردووه‌ته‌وه، وتبووی: “ئیتر به چ مافێك ئه‌و ده‌سه‌ڵاته‌ی پێدراوه به ویستی خۆی له پارێزگاكاندا ده‌سوڕێته‌وه و بازگه داده‌نێت”.
حه‌سه‌ن جیهاد، وتیشی:”ئه‌وان داوایان ده‌كرد هێزی سوپای عیراق بچێته نێو شاره‌كان، به‌ڵام پێداگریم كرد له‌وه‌ی به‌پێی رێكاره یاساییه‌كان نابێت سوپا له ناو شاره‌كاندا بێت، به‌ڵكو هێزه‌كانی ناوخۆ شار ده‌پارێزن، پارێزگای كه‌ركوكیش پێویستییان به (13) هه‌زار پۆلیس هه‌یه و له ئێستادا ته‌نها (11) هه‌زار دامه‌زراوه”.
ئه‌و ئه‌ندامه‌ی لیژنه‌ی ئاسایش‌و به‌رگری په‌رله‌مان، داواشیكرد دوو هه‌زار پۆلیس بۆ پارێزگای كه‌ركوك دابمه‌زرێندرێت بۆ ئه‌وه‌ی بۆشاییه ئه‌منییه‌كان پڕ بكه‌نه‌وه، ته‌ئكیدیشیكرده‌وه، گه‌ر ئۆپه‌راسیۆنی دیجله بچێته نێو شاری كه‌ركوكه‌وه، ئه‌وا زه‌ره‌رمه‌ندی یه‌كه‌م هێزه‌كه‌ی خۆیان ده‌بێت، وتیشی:”ئه‌وان هێزێكی پته‌و نین و جۆری چه‌كه‌كانیشیان باش نییه، ئه‌مه جگه له‌وه‌ی خۆیان بڕوایان به‌سه‌ربازه‌كانیان نییه و بێ وره‌ن و زۆرێك له فه‌وجه‌كانیش ژماره‌ی راسته‌قینه‌ی سه‌ربازه‌كانیان له ژماره‌ی دیاریكراو كه‌متره، چونكه زۆرێك له‌سه‌ربازه‌كان ته‌نها ناویان هه‌یه و خۆیان بوونیان نییه”.
Kurdish