ئاماری ره‌سمی یه‌كێك له‌په‌یمانگه پسپۆڕه‌كانی به‌رازیل ئه‌وه‌ی ده‌رخستووه، كه گه‌شه‌ی ئابووریی ئه‌و وڵاته له‌چاره‌كی دووه‌می ئه‌مساڵدا چاوه‌ڕوان نه‌كراو بووه‌‌و به‌به‌راورد له‌گه‌ڵ گه‌شه‌ی ئابوورییه‌كه‌ی له‌هه‌مان ماوه‌ی ساڵی رابردووشدا زیادیكردووه.
ئاماره‌كان ئاماژه بۆ ئه‌وه ده‌كه‌ن، زۆربه‌ی ئه‌و گه‌شه‌كردنه‌ی له‌بواری ئابووریدا له‌به‌رازیل رووی داوه، هۆكار‌و سه‌رچاوه‌كه‌ی گه‌شه‌كردنی كه‌رتی كشتوكاڵ‌و زیادبوونی به‌رهه‌مه ناوخۆییه‌كانیه‌تی.
وه‌زیریش به‌هه‌ڵه‌دا چووه
په‌یمانگه‌ی جوگرافیا‌و ئاماری به‌رازیلی له‌ڕاپۆرتێكیدا ئاماژه‌ی به‌وه‌كردووه، كه ئابووریی وڵاته‌كه‌ی له‌چاره‌كی دووه‌می ئه‌مساڵدا به‌ڕێژه‌ی (3,3%) زیادیكردووه، ئه‌و رێژه‌یه‌ش (1,5%)ی له‌هه‌مان ماوه‌ی ساڵی رابردوو زیاتره، ئه‌و ئاسته‌ش له‌گه‌شه‌كردن چاوه‌ڕوان نه‌كراو بووه، چونكه پسپۆڕانی ئابووری پێشتر له‌و باوه‌ڕه‌دابوون كه ئابووری به‌رازیل له‌و ماوه‌یه‌دا به‌ڕێژه‌ی (0,9%) گه‌شه ده‌كات.
جۆیدۆ مانتێگا وه‌زیری دارایی ئه‌و وڵاته پێشبینییه‌كانی خۆی بۆ گه‌شه‌ی ئابووری له‌تێكڕای ساڵی 2013دا كه‌مكرده‌وه‌‌و دایبه‌زاند بۆ (2,5%)، له‌كاتێكدا پێشبینییه‌كانی پێشتر (3%) بوو.
ئه‌و وه‌زیره پێشبینی خۆی بۆ گه‌شه‌ی ئابووریی به‌رازیل له‌ساڵی 2014شدا كه‌مكرده‌وه‌‌و دایبه‌زاند بۆ (4%) كه پێشتر (4,5%)ی بۆ له‌به‌رچاو گرتبوو.
فاسۆلیا هۆكاری سه‌ره‌كییه
هۆكاری پشت ئه‌م زیادبوونه‌ی گه‌شه‌ی ئابووریی به‌رازیل زیادبوونی به‌رهه‌می كشتوكاڵیی ئه‌و وڵاته بوو به‌ڕێژه‌ی (3%)، به‌تایبه‌ت كه ئه‌م زیادبوونه‌ی به‌رهه‌می كشتوكاڵیی دوابه‌دوای ئه‌وه‌دێت كه له‌وه‌رزی یه‌كه‌می ساڵیشدا كشتوكاڵ به‌ڕێژه‌ی (9,7%) زیادی كردبوو.
له‌و زیادبوونه‌ی به‌رهه‌می كشتوكاڵیشدا به‌رهه‌می فاسۆلیا دیارترین به‌رهه‌مه‌‌و پشكی سه‌ره‌كی زیادبوونه‌كه‌ی پێده‌بڕێت، چونكه ته‌نیا له‌چاره‌كی دووه‌می ئه‌مساڵدا‌و به‌به‌راورد به‌ساڵی رابردوو به‌رهه‌می فاسۆلیا به‌ڕێژه‌ی (23,7%) زیادیكردووه، هه‌روه‌ها به‌رهه‌می گه‌نمه‌شامیش به‌ڕێژه‌ی (12,2%) زیادیكردووه‌‌و به‌رهه‌مه پاقله‌مه‌نییه‌كانیش به‌گشتیی (8,4%) زیادیكردووه‌‌و برنجیش به‌ته‌نیا خۆی به‌ڕێژه‌ی (2,9%) زیادیكردووه، شانبه‌شانی ئه‌م زیادكردنه، كه‌رتی پیشه‌سازیی له‌هه‌مان ماوه‌دا به‌ڕێژه‌ی (2%) فراوان بووه‌‌و كه‌رتی خزمه‌تگوزاریش به‌ڕێژه‌ی (0,8%) گه‌شه‌ی كردووه.
نرخی دراویشی به‌رز كرده‌وه
هه‌موو ئه‌و گه‌شه‌كردنانه بوونه هۆی ئه‌وه‌ی ئابووری به‌رازیل به‌شێوه‌یه‌كی گشتیی گه‌شه بكات‌و له‌پاڵ ئه‌وه‌شدا بازاڕی دراوی ئه‌و وڵاته‌ش سوودمه‌ند بوو، چونكه له‌ئه‌نجامی ئه‌و گه‌شه چاوه‌ڕوان نه‌كراوه‌ی ئابووری، نرخی دراوی به‌رازیلیش له‌به‌رامبه‌ر دۆلاری ئه‌مریكادا به‌ڕێژه‌ی (0,8%) به‌رز بۆوه. ئه‌وه‌ش كه‌مێك قه‌ره‌بووی ئه‌و زیانانه‌ی بۆ ده‌كاته‌وه كه له‌سه‌ره‌تای ئه‌مساڵدا به‌هۆی دابه‌زینی به‌های دراوه‌كه‌یه‌وه به‌ڕێژه‌ی (20%) پێی گه‌یشتبوو.
پاشه‌كه‌وت له‌دابه‌زیندایه
هۆكاری ئه‌و دابه‌زینه‌ی سه‌ره‌تای ساڵیش بڵاوبوونه‌وه‌ی پێشبینییه‌ك بوو له‌باره‌ی ئه‌گه‌ری به‌رزبوونه‌وه‌ی به‌های دۆلاری ئه‌مریكی به‌هۆی ده‌ستبه‌رداربوونی حكومه‌تی واشنتۆن له‌خه‌رجكردنی پشتیوانیی له‌دۆلار، كه ده‌بێته هۆی به‌رزبوونه‌وه‌ی دۆلار، ئه‌م پێشبینییه‌ش وایكرد به‌شێك له‌خاوه‌ن سه‌رمایه‌كانی به‌رازیل سه‌رمایه‌كانیان بگوێزنه‌وه بۆ ئه‌مریكا.
به‌وته‌ی دیڤید ریس پسپۆڕی بازاڕی وڵاتانی گه‌شه‌نده له‌گروپی (كاپیتاڵ كۆمیكس) ئه‌و هه‌واڵانه‌ی به‌باره‌ی گه‌شه‌ی ئابووریی به‌رازیل‌و به‌رزبوونه‌وه‌ی ئاستی داهاتی گشتیی ئه‌و وڵاته‌وه، هه‌واڵی زۆر باشن، به‌ڵام به‌رازیل گرفتێكی ئابووری تری هه‌یه، ئه‌ویش لاوازیی به‌كاربردن‌و دابه‌زینی ئاستی پاشه‌كه‌وتی ناوخۆییه، ئه‌وه‌ش وامان لێده‌كات بگه‌ینه ئه‌و ئه‌نجامه‌ی كه ئابووری هه‌رچییه‌ك بكات نه‌گاته رێژه‌ی گه‌شه‌ی (5%).
Kurdish