ئینسکلۆپیدیای شاری سلێمانی به‌ جیهان ئاشنا ده‌کرێت

رۆژی‌ 7ی‌ ئەم مانگە، له‌ حه‌وشی بینای سه‌رای کۆن له‌ شاری سلێمانی به‌ ئاماده‌بوونی ، هێرۆ ئیبراهیم ئه‌حمه‌د- لێپرسراوی مه‌ڵبه‌ندی 1ی ڕێکخستنی سلێمانی و پارێزگاری سلێمانی و به‌رپرسانی ئه‌منی و به‌ڕێوه‌به‌رانی فه‌رمانگه‌کان و که‌سایه‌تیه‌ دیاره‌کان و ڕۆشنبیران و میوانانی بیانی ڕێوڕه‌سمی واژۆکردنی ئینسکلۆپیدیای سلێمانی له‌گه‌ڵ ڕێکخراوی یونسکۆ سازکرا.

مه‌راسیمه‌که‌ به‌چه‌ندین شعری شاعیرانی سلێمانی بۆ سلێمانی ده‌ستیپێکرد و له‌ لایه‌ن چه‌ندین گروپی میوزیک و میللی گۆرانی وچالاکی فۆلکلۆری ڕه‌سه‌ن نمایشکرا.

له‌ وته‌یه‌کیدا هێرۆ ئیبراهیم ئه‌حمه‌د ئاماژه‌یدا به‌ پڕۆژه‌که‌ و وتی”ماوه‌یه‌ک زۆر به‌هیوای ئه‌وه‌ بووین ئینسکلۆپیدیایه‌ک بۆ شاری سلێمانی دروست بکه‌ین، به‌ڵام سه‌ره‌تا به‌و شێوه‌یه‌ نه‌بوو ده‌بوو به‌شێوه‌یه‌کی گه‌وره‌ و پێشکه‌وتوو ئه‌و پڕۆژه‌ جێبه‌جێبکرێت، چونکه‌ وه‌ک هه‌موومان ده‌زانین شاری سلێمانی و خه‌ڵکه‌که‌ی حه‌زی به‌ داهێنان و نوێگه‌ری هه‌یه‌ و حه‌زی به‌ ته‌قلید و ڕۆتین نیه”

بۆیه‌ بیرمان له‌وه‌ کرده‌وه‌ به‌و شێوه‌یه‌ بێت، له‌گه‌ڵ ڕێکخراوی یونسکۆ ماوه‌ی زیاتر له‌ ساڵونیوێک ده‌بێت تاوتوێی ئه‌و پڕۆژه‌یه‌مان کردو ڕێکه‌وتین له‌سه‌ر ئه‌وه‌ی که‌ بودجه‌ی پڕۆژه‌که‌ دابین بکه‌ین و ئه‌وان سه‌رپه‌رشتی بکه‌ن، خۆشحاڵی پڕۆژه‌که‌ش له‌وه‌دایه‌ به‌ دوو لایه‌نه‌ لایه‌نێکیان ئه‌وه‌یه‌ که‌ به‌ سیستمی ئۆنلاین له‌سه‌ر ئینته‌رنێت په‌خش ده‌کرێت و خه‌ڵک ده‌توانێت بیبینێت و ڕای خۆی له‌سه‌ر بڵێت، لایه‌نێکی تری ئه‌وه‌یه‌ که‌ وه‌ک کتێب پڕۆژه‌که‌ داده‌نرێت، هه‌روه‌ها پڕۆژه‌که‌ بۆ شاری سلێمانی و ده‌وروه‌به‌رێتی .

لێپرسراوی مه‌ڵبه‌ندی 1ی ڕێکخستنی سلێمانی وتیشی : ئه‌و پڕۆژه‌یه‌ ده‌بێته‌ پڕۆژه‌یه‌کی ناوازه‌و به‌و هیوایه‌ی جێگه‌ی دڵخۆشی بێت بۆ سنووره‌که‌ و که‌سیش خاوه‌نی پڕۆژه‌که‌ نیه‌ و پڕۆژه‌که‌ پڕۆژه‌ی شاری سلێمانیه‌و هه‌موو خه‌ڵکه‌که‌ی خاوه‌نێتی.

خاتوو هێرۆ ئیبراهیم ئه‌حمه‌د ئاماژه‌ی به‌وه‌شدا” هیوادارم که‌ هه‌موو که‌سێک له‌ که‌سانی پسپۆڕ و شاره‌زا به‌شداری له‌و پڕۆژه‌یه‌دا بکات به‌ تایبه‌ت ئه‌و ماوه‌یه‌ی که‌ بۆ پڕۆژه‌که‌ دانراوه‌ سێ ساڵه‌ و بۆیه‌ ده‌کرێت که‌ گۆڕانکاری و نوێگه‌ری بکرێت و به‌ جوانترین شێوه‌ ته‌واو بکرێت که‌ شایه‌نی خه‌ڵکی شاری سلێمانی بێت.

ڕاشیگه‌یاند: یه‌کێکی تر له‌و کێشانه‌ی که‌ لای من و خه‌ڵک هه‌بووه‌ کێشه‌ی سپێڵی ناوی سلێمانیه‌ که‌ هه‌ر یه‌که‌و به‌ شێوه‌یه‌ک ته‌فسیری بۆ ده‌کات، هه‌رچه‌نده‌ له‌وانیه‌ بۆ ئه‌مڕۆ کێشه‌یه‌کی وا گه‌وره‌ نه‌بێت، به‌ڵام له‌ داهاتوودا ده‌بێته‌ کێشه‌یه‌کی گه‌وره‌ به‌ تایبه‌ت به‌ زمانی ئینگلیزی کێشه‌یه‌کی گه‌وره‌ ده‌بێت، چونکه‌ هه‌ر که‌سه‌و به‌ جۆرێک سپێڵی ده‌کات، بۆیه‌ به‌ پێویستی ده‌زانم که‌ هه‌موو ئاماده‌بووان و ڕۆشنبیران کارێک بکه‌ین که‌ سلێمانی له‌و سه‌د ناویه‌ی هه‌یه‌تی ڕزگاری بکه‌ین.

محه‌مه‌د جه‌لید- نوێنه‌ری ڕێکخراوی یونسکۆ له‌ عێراق له‌ وتارێکیدا ئاماژه‌ی به‌وه‌دا ” خۆشحاڵین که‌ هاوکاری شاری سلێمانی ده‌که‌ین به‌م پڕۆژه‌یه‌، هه‌وڵ ده‌ده‌ین ئه‌و پڕۆژه‌یه‌ به‌سه‌رکه‌وتووی بخه‌ینه‌ گه‌ڕ،جگه‌ له‌وه‌ش چه‌نده‌ها پڕۆژه‌ی تر هه‌بووه‌ که‌ هاوکاری ماددی و مه‌عنه‌وی ئێمه‌ی کردووه‌ له‌ بواری جیاجیادا”.

ئه‌گه‌ر نه‌زانینت ڕابردووت چیه‌ نازانیت داهاتووت چیه‌،بۆیه‌ ده‌بێت داهاتوویه‌کی جوان دروست بکه‌ین چیان ئه‌توانی له‌به‌شی ڕابردوویه‌کی تیًَبگه‌یت، به‌ڵام ئه‌توانیت بۆ به‌شی داهاتووی ، خوی،َدنه‌وه‌ی ڕابردوویش پێناسه‌یه‌ک بۆ داهاتوو ده‌به‌خشێت.

له‌ به‌شێکی تری وتاره‌که‌یدا نوێنه‌ری ڕێکخراوی یونسکۆ ڕایگه‌یاند: هه‌وڵدان بۆ به‌روپێشخستن و بره‌ودان به‌ بواری که‌له‌پوری فه‌رهه‌نگی کوردستان یه‌کێکه‌ له‌و کارانه‌ی که‌ زۆر گرنگه‌ ئه‌نجام بدرێت، چونکه‌ ووشه‌کان زۆر به‌ خێرای پێشده‌که‌ون، بۆیه‌ ئه‌م پڕۆژه‌یه‌ گه‌وره‌یه‌ له‌ بواری که‌له‌پوری و مێژووی شاری سلێمانی و کوردستان، هه‌روه‌ها هه‌موو ئه‌و زانیاریانه‌ی تایبه‌ت به‌ شاری سلێمانی له‌و پڕۆژه‌یه‌دا کۆده‌کرێته‌وه‌ که‌ له‌ چه‌ند سه‌رچاوه‌یه‌کی جیاواز و فراوانه‌وه‌ دروست کراوه‌، له‌ لایه‌ن لایه‌نی جیاوه‌ پڕۆژه‌که‌ پێکده‌هێنرێت یه‌کێکیان ئه‌وانه‌ن که‌ بۆردێکی لۆکاڵی خۆماڵی سلێمانیانه‌ کار له‌سه‌ر ئه‌م پڕۆژه‌یه‌ ده‌کات و بۆردێکی تریشیان بریتیه‌ له‌ زانایانی یونسکۆ و نێوده‌وڵه‌تی و دواجار به‌ زمانی کوردی بڵاو ده‌کرێته‌وه‌، ئه‌وه‌شی که‌ جیاوازیه‌کی گه‌وره‌ی تێدایه‌ بریتیه‌ له‌و ئۆنلاینه‌ی له‌ ئینسکلۆپیدیاکه‌دا هه‌یه‌ له‌سه‌ر ئینته‌رنێت که‌ دنیا ده‌توانێت شاره‌زای شاری سلێمانی بێت.

پاشان مه‌راسیمی په‌یوه‌ستنامه‌ی ئینسکلۆپیدیای سلێمانی له‌ نێوان خاتوو هێرۆ ئیبراهیم ئه‌حمه‌د و نوێنه‌ری ڕێکخراوی یونسکۆدا واژۆکرا.

به‌هرۆز محه‌مه‌د ساڵه‌ح پارێزگاری سلێمانی له‌ لێدوانێکی تایبه‌تدا به‌ SNN ی ڕاگه‌یاند: پڕۆژه‌یه‌کی نوێگه‌ریه‌ بۆ شاری سلێمانی و شاری زیندوویش پێویستی به‌و سیستمه‌یه‌ که‌ ئێستا به‌ شێوه‌ی ئۆنلاین له‌سه‌ر ئینته‌رنێت سلێمانی به‌ هه‌موو جیهان ئاشنا ده‌بێت.

فاروقی مه‌لا مسته‌فا- که‌سایه‌تی شاری سلێمانی له‌ لێدوانێکیدا به‌ SNN ی ڕاگه‌یاند: زۆر گرنگه‌ ده‌رباره‌ی شاری سلێمانی له‌ هه‌موو بواره‌کانه‌وه‌ ڕاده‌ی پێشکه‌وتن و گه‌شه‌سه‌ندن و مێژوی شاری سلێمانی بخوێنێته‌وه‌ که‌ کراوه‌یه‌ بۆ هه‌موو که‌سێک زانیاریه‌کانی خۆی دابنێت، به‌ڵام ئه‌وه‌ی گرنگه‌ پڕۆژه‌که‌ پێویستی به‌ ده‌سته‌ی نوسه‌رانێکی گه‌وره‌و شاره‌زا هه‌یه‌ تا سه‌رپه‌رشتی بکات.
وتیشی : هیوادارم پڕۆژه‌که‌ به‌شی سه‌ره‌کی بۆ لایه‌نی سیاسی نه‌بێت و باسی که‌ڵه‌ پیاوان و بازرگانان و ناوداره‌ کۆنه‌کانی شار گرنگیه‌کی زیاتری هه‌بێت.