مه رزي سه يران به ڕەسمی ناسێندراو ڕێکارەکانی بە زویی کردنەوەی خێراتر کرا

وەفدێكی باڵای حكومەتی هەرێم بەسەرۆكایەتی بریكاری وەزارەتی ناوخۆ سەردانی كۆماری ئیسلامی ئێرانی كرد و ڕێكارەكانی بەنێودەوڵەتیكردنی مەرزی سەیران بەنی دەستپێكرد.

ئەمڕۆ 2021/2/28 لیوا چەتۆ ساڵح سەعید بریكاری وەزارەتی ناوخۆی حكومەتی هەرێمی كوردستان هاوڕێ لەگەڵ ئاغای مەهدی شوشتری سەركونسوڵی كۆماری ئیسلامی ئێران و ئازاد محەمەد سەرۆكی ئەنجومەنی پارێزگای سلێمانی و لەیلا عەلی جێگری پارێزگاری سلێمانی و عمید كاكەبرا فەرماندەی لیوای پاسەوانی سنوری پارێزگای سلێمانی و لێپرسراوانی ئیدارەی قەزای پێنجوێن، سەردانی مەرزی سەیران بەنی كرد.

سەرەتا وەفدی حكومەتی هەرێم لەگەڵ بەهمن مرادنیا پارێزگاری سنە و ڕۆستەم پور قایمقامی قەزای بانە و لێپرسراوانی ئیداریی مەرزەكە، بەشەكانی مەرزی سەیران بەنیان لەهەردوو دیوی هەرێمی كوردستان و كۆماری ئیسلامی ئێرانەوە بەسەركردەوە.

دواتر وەفدەكەی حكومەتی هەرێمی كوردستان بۆ تاوتوێكردنی هەنگاوەكانی بەنێودەوڵەتیكردنی مەرزی سەیران بەن و گەیشتن بەلێكتێگەیشتنێكی هاوبەش، سەردانی قەزای بانەیان كرد.

لەكۆبوونەوەیەكدا پارێزگاری سنە بەگرنگییەوە لەسەردانی وەفدەكەی هەرێمی كوردستانی ڕوانی و رایگەیاند ئەم سەردانە گرنگە بەلای ئێمەوە چونكە قسە لەسەر بابەتێك دەكەین كەسودی زۆری بۆ هەردوولا هەیە، پاشان قایمقامی بانە خۆشحاڵی خۆی بۆ سەردانی وەفدی باڵای هەرێمی كوردستان دەربڕی و ڕایگەیاند ئامادەی هەموو جۆرە هاوكارییەكین لەگەڵ هەرێمی كوردستاندا.

لەتەوەرێكی تری كۆبوونەوەكەدا مەهدی شوشتری سەركونسوڵی كۆماری ئیسلامی ئێران لەسلێمانی سوپاسی لیوا چەتۆ ساڵح بریكاری وەزارەتی ناوخۆی كرد كەتوانیویەتی بەشێكی بەرچاوی كێشەی دەروازە سنورییەكانی نێوان هەردوولا چارەسەر بكات، وتیشی هەرچییەكمان پێ بكرێت هاوكار دەبین بۆ بەنێودەوڵەتیكردنی مەرزی سەیران بەن.

لەبەرامبەردا لیوا چەتۆ ساڵح بریكاری وەزارەتی ناوخۆی هەرێم ڕایگەیاند ئێمە بەنوێنەرایەتی بەڕێز قوباد تاڵەبانی جێگری سەرۆكی حكومەتی هەرێمی كوردستان و وەزارەتی ناوخۆ ئامادەی ئەم كۆبونەوەیەین، جەختیشی كردەوە كەوەك هەرێمی كوردستان هەرچی زووە ڕێكارەكانی بەنێودەوڵەتیكردنی مەرزی سەیران بەن تەواودەكەین چونكە بە بەنێودەوڵەتیكردنی مەرزەكە سەرباری كورتكردنەوەی رێگای هاتوچۆی هاوڵاتیان و دەستەبەركردنی هەلی كاری زیاتر بۆ خەڵكی سنورەكە، دەتوانین قەبارەی ئاڵوگۆڕی بازرگانی لەگەڵ كۆماری ئیسلامی ئێران زیاد بكەین لەپێناوی بەرژەوەندییە هاوبەشەكانی هەردوولادا.

لیوا چەتۆ ساڵح ئاماژەی بەوەشكرد كە لەئێستادا ساڵانە بەبەهای نزیكەی (٢٣٠) ملیۆن دۆلار ئاڵوگۆڕی كاڵاو شتومەك دەكرێت لەم مەرزەدا، بە بەنێودەوڵەتیكردنیشی، چاوەڕوان دەكرێ ئەو بڕە هەڵبكشێت بۆ نزیكەی دوو هێندە.

لەئەنجامی كۆبوونەوەكەشدا لێكتێگەیشتنێكی هاوبەش بۆ چارەسەركردنی كۆی كێشە و كەموكورتیەكان و خێرا راپەڕاندنی هەنگاوەكانی بەنێودەوڵەتیكردنی مەرزی سەیران بەن لەنێوان هه ردوولا ده ست نيشان كرا تاوه كوو له ئایندەیەکی نزیکدا ڕێکەوتنی کۆتایی واژوو بکرێت.