نرخی نەوت بەرزبووەوە

نرخی نەوت ئەمڕۆ دووشەممە 22ی شوبات بەرزبووەوە و ئەمەش بەهۆی وردە وردە گەڕانەوەی بەرهەمهێنانی نەوتی خاوی ئەمریکی کە بەهۆی ئەو دۆخی سەرما و بەستنەی ڕووی لەو وڵاتە کردووە ڕاگیرابوو، هەروەها هۆکارێکی دیکەی گەڕانەوەی خواستە لەسەر نەوت.

نرخی بەرمیلێک نەوتی خاوی برێنت لە بازاڕەکانی جیهاندا بەبڕی 76 سەنت و ڕێژەی %1.2 بەرزبووەوە و نرخەکەی گەیشتە 63.86 دۆلار، دوای ئەوەی لە هەفتەی رابردوودا نرخەکەی بەڕێژەی %1 بەرزبووەوە.

هەروەها نرخی بەرمیلێک نەوتی خاوی تەکساس بەبڕی 74 سەنت و ڕێژەی %1.3 بەرزبووەوە و گەیشتە 60.04 دۆلارلە کاتێکدا لە کۆتایی هەفتەی ڕابردوودا بەڕێژەی %0.4 نرخەکەی دابەزی.

شیکەرەوەکانی بواری وزە باس لەوەدەکەن کە ئەو سەرما و بەستنەی ڕووی لە ویلایەتی تەکساسی ئەمریکا کردووە کاریگەری کردووەتە سەر ڕاگرتنی بڕی چوار ملیۆن بەرمیل نەوت لە ڕؤژێکدا هەروەها بڕی 21 ملیار پێ سێجا گازی سروشتی کە لە کێڵگەکانی ئەو وڵاتەوە دەخرانە بازاڕی نەوتەوە.