وەزارەتی نەوتی عێراق دەڵێت، داهاتی مانگی ڕابردووی نەوت زیاتر لە چوار ملیار دۆلار بووە.
وەزارەتەكە ئەمڕۆ پێنجشەممە 18ی شوبات بڵاویكردەوە، هەناردەی نەوت لە مانگی كانونی دووەمی ڕابردوو گەیشتووەتە 88 ملیۆن و 922 هەزار و 697 بەرمیل.
ڕونیشیكردوەتەوە، هەناردەی نەوت لە ناوەڕاست و باشوور گەیشتووەتە 85 ملیۆن و 870 هەزار و 503 بەرمیل، بە داهاتی چوار ملیار 602 ملیۆن و 609 هەزار دۆلار، لەكاتێكدا هەناردەی نەوتی كەركوك لە بەندەری جیهان سێ ملیۆن و 52 هەزار و 194 بەرمیل بووە بە داهاتی 162 ملیۆن و 391 هەزار و 98 دۆلار.
تێكڕای نرخی بەرمیلێك نەوتیش گەیشتووەتە (53.586) دۆلار، بەپێی ڕاگەیەنراوەكە.
ئاشكراشیكردووە، بڕە هەناردەكراوەكە لەلایەن 29 كۆمپانیای جیهانی فرە ڕەگەز لە بەندەرەكانی بەسرە و خور و جیهان-ەوە گوازراونەتەوە.
Kurdish