سەرۆکوەزیرانی عێراق، مستەفا کازمی، ئەوەی ئاشکرا کرد کە عێراق، دەیەوێت وەبەرھێنەرە تورکەکان رابکێشێت بۆخۆی و لە فراوانکردنی بنکەی ئابووریدا پەیوەستییەکانی بە نەوت کەمبکاتەوە.
سەرۆکایەتی وەزیرانی عێراق، لەو بارەیەوە راگەیەندراوێکی بڵاوکردوەتەوە و تیایدا ئەوە خراوەتەڕوو کە کازمی لە درێژەی سەردانەکەیدا بۆ ئەنقەرە لەگەڵ ژمارەیەکی زۆر لە وەبەرھێنەر و سەرمایەدارانی تورکیا کۆبووەتەوە.
سەرۆک وەزیرانی عێراق لە کۆبوونەوەکەدا باسی لە ئاسانکاری کردن بۆ وەبەرھێنەرە تورکەکان کردوە و رایگەیاندوە “عێراق، دەیەوێت وەبەرھێنەرە تورکەکان رابکێشێت بۆخۆی و لە فراوانکردنی بنکەی ئابووریدا پەیوەستییەکانی بە نەوت کەمبکاتەوە. بۆ ئەم مەبەستەش وڵاتەکەمان کار دەکات بۆ رەخساندنی زەمینەی کار بۆ وەبەرھێنەرە تورکەکان و ئەزموونەکانیان”.
جێی وەبیرھێنانەوەیە دوێنی سەرۆکوەزیرانی عێراق، مستەفا کازمی لەسەر بانگهێشتی سەرکۆماری تورکیا، رەجەب تەیب ئەردۆغان، سەردانی ئەنقەرەی کرد.
Kurdish