ئاژانسی هەواڵی (ئینتەر فاکس)ی روسی بڵاویکردوە، سەرۆک وەزیرانی عێراق داوای لە کۆمپانیای گازپرۆمی نەوتی روسی کردوە، کارەکانی لەهەرێمی کوردستان رابگرێت.
لە هەوالێکیدا ئەو ئاژانسە ئاماژەی بەوەداوە: مالیکی داوای راگرتنی کارەکانی ئەو کۆمپانیایەی کردوە لە هەرێمی کوردستان تا ئەوکاتەی یاسای نەوتی نوێ دەردەچێت.
ئەوەش دەخاتەڕو: مالیکی پێی باشبوە ئەو کۆمپانیایە کارەکانی رابگرێت و دواتر بەپێی یاسا نوێکەی نەوت گرێبەست واژۆبکاتەوە تاوەکو کێشە دروست نەبێت.
کۆمپانیای گازپرۆمی نەوتی بە یەکێک لە کۆمپانیا سەرەکییەکانی روسیا دادەنرێت لەروی بەرهەمهێنانی غازی روسیاوە و هەناردەکردنەوە و لە هەرێمی کوردستانیش لە دو گێڵگەی نەوتیدا کار دەکات.
ئه‌وه له‌كاتێكدایه رۆژی (20)ی ئه‌م مانگه، مەسعود بارزانی سەرۆکی هەرێمی کورستان سەردانی روسیای کرد و له شاری بیترۆسبۆرگ له‌گه‌ڵ ئه‌لیكسی میلله‌ر سه‌رۆكی ئه‌نجومه‌نی كارگێڕی كۆمپانیای گازپرۆم نەوتی روسیا كۆبۆوه .
له كۆبونه‌وه‌كه‌دا سه‌رۆكی ئه‌نجومه‌نی كارگێڕی كۆمپانیاكه تەئکیدیکردوە له به‌رده‌وامیدان به پرۆژه و گرێبه‌سته‌كانی كاركردنیان له هه‌رێمی كوردستان كرده‌وه و له پلانی فراوانتر كردنی كاره‌كانیشیان دوا به جۆرێك كه بواره جیاجیاكانی دیكه‌ی ژێرخانی ئابوریش له هه‌رێمی كوردستان بگرێته‌وه.
لای خۆشیەوە مەسعود بارزانی ئاماده‌یی هه‌رێمی بۆ فراوانتركردنی كار و پرۆژه هاوبه‌شه‌كانی نێوان هه‌ردولا نیشاندا و بانگهێشتی سه‌رۆك و ئه‌ندامانی ئه‌نجومه‌نی به‌ڕێوه‌بردنی كۆمپانیای گازپرۆمیشی كرد تا سه‌ردانی هه‌رێمی كوردستان.
Kurdish