بەپێی ڕاگەیەنراوێکی نوێنەرایەتی حکومەتی هەرێم لە واشنتن کۆنفرانسێک سەبارەت بە ئابوری هەرێمی کوردستان لە ئەمریکا بەڕێوەدەچێت و بڕیارە مەسرور بارزانی، سەرۆکی حکومەتی هەرێم بەشداری تێدا بکات.
بەپێی زانیارییەکانی نوێنەرایەتی حکومەتی هەرێم لە واشنتن کۆنفرانسەکە ڕۆژانی 23 و 24 ی تشرینی دووەم بەشێوەی ئۆنلاین بەڕێوەدەچێت.
بڕیارە لە کۆنفرانسەکەدا پرسی ئابوری هەرێمی کوردستان دوای کۆرۆنا تاوتوێ بکرێت و حکومەتی هەرێم و ژورە بازرگانی و پیشەسازییەکانی ئەمریکا سەرنجی خۆیان بخەنەڕوو.
لە کۆنفرانسەکەدا بڕیارە ئەو کۆمپانیا ئەمریکییانەی کە لە هەرێمی کوردستان کاردەکەن، بەشداری بکەن و ئەوانیش لەسەر ئابوری هەرێم تێڕوانینیان هەبێت.
هەر لەو کۆنفرانسەدا گفتوگۆی چۆنییەتی پەرەپێدانی گەشەی ئابووری لە هەرێمی کوردستان، هەلی وەبەرهێنان لە هەرێمی کوردستان، گرنگیپێدان بە ئاسایشی خۆراک، ئاییندەی پەیوەندییەکانی ئەمەریکا و عێراق لە بواری وزە دەکرێت.
Kurdish