له‌گه‌ڵ كردنه‌وه‌ی بۆرسه‌ی جیهانی، ئه‌مڕۆ ڕۆژێكی ڕه‌ش ده‌بێت بۆ دراوی لیره‌ی توركی، به‌هۆی ئه‌وه‌ی به‌شێوه‌یه‌كی چاوه‌ڕواننه‌كراو 14 لیره زیاتر له دوو ڕۆژی ڕابردوودا له نرخه‌كه‌ی دابه‌زی.
ئاوێنە: ئه‌مڕۆ پێنجشه‌ممە، 24ی ئه‌یلول، موراد سوڵتان له بۆرسه‌ی باكوری توركیا له ویلایه‌تی ترابزۆن ڕاگه‌یاند، به‌یانی ئه‌مڕۆ دۆلاری ئه‌مه‌ریكا نرخی به‌رانبه‌ر لیره زیاتر به‌رز بووه‌وه و گۆڕانكاری به‌سه‌ردا هات، 100 دۆلاری ئه‌مه‌ریكی به 773 لیره‌ی توركی له بۆڕسه‌كانی توركیا ئاڵوگۆڕی پێ ده‌كرێت، له بازاڕی ئازادیشدا تا 800 نرخه‌كه‌ی دابه‌زیوه و مامه‌ڵه‌ی پێوه كراوه.
زیاتر وتی، “له ته‌واوی ته‌مه‌نمدا هیچ كات لیره‌ی توركی دابه‌زینی به‌مشێوه‌یه‌ی ئه‌مڕۆی به‌خۆیه‌وه نه‌بینیوه، به‌شێوه‌یه‌كی گشتی به‌های دراوه‌كه له ماوه‌ی هه‌شت مانگی ساڵی 2020دا، %40 دابه‌زیوه.”
به‌پێی زانیارییه‌كان له هه‌رێمی كوردستاندا ئێسته 100 دۆلاری ئه‌مه‌ریكی به‌رانبه‌ر 765 لیره‌ی توركی ئاڵوگۆڕی پێوه ده‌كرێت.
دابه‌زین و به‌رزبوونه‌وه‌ی نرخی لیره له‌ژێر كاریگه‌ریی سیاسه‌ته‌كانی ئه‌ردۆغان و هه‌ڵگیرساندنی جه‌نگی جۆراوجۆر له لایه‌ك و سیاسه‌ته‌كانی ناوخۆ له‌لایه‌كی تر بووه، ئه‌م دابه‌زینه‌یش چه‌ند ساڵێكه به‌رده‌وامه، بۆیه گومان ده‌كرێت حكوومه‌تی ئه‌و وڵاته په‌نای بردبێته‌به‌ر چاپكردنی پاره له ناوخۆی وڵات.
ئێسته زۆربه‌ی كۆمپانیاكانی فرۆشتنی خانوو و زه‌وی له توركیا، كڕین و فرۆشتنیان ڕاگرتووه، جگه له‌وه‌یش زۆربه‌ی شوێنه گه‌شتیارییه‌كانی توركیا مامه‌ڵه‌ی ڕاسته‌وخۆ به لیره‌ی توركی ده‌كه‌ن به‌هۆی به‌رده‌وامی له دابه‌زینی نرخی لیره به‌رانبه‌ر دراوه بیانییه‌كان.
Kurdish