هه‌ندێجار غیره لای ژنان به به‌هێزی هه‌ستی پێده‌کرێت به‌تایبه‌تی که هاوسه‌ره‌کانیان له‌گه‌ڵ ئافره‌تێکی تر ده‌که‌ونه گفتوگۆ .
نکۆڵی ناکرێت له‌وه‌ی که له‌ژیانی هه‌ر ژن‌و مێردێکدا غیره هه‌یه، به‌ڵام ئه‌مه‌ش له‌که‌سێکه‌وه بۆ که‌سێکی تر ده‌گۆڕێت لای هه‌ندێ که‌س به زۆریی‌‌و به ئاشکرایی هه‌ستی پێده‌کرێت، لای هه‌ندێکی تر نهێنیه‌و پێوه‌ی دیار نییه، یاخود جۆره‌که‌ی جیاوازه له‌نێوان هه‌ردوولادا.
هه‌ندێجار غیره لای ژنان به به‌هێزی هه‌ستی پێده‌کرێت به‌تایبه‌تی که هاوسه‌ره‌کانیان له‌گه‌ڵ ئافره‌تێکی تر ده‌که‌ونه گفتوگۆ، له‌هه‌مان کاتدا لای پیاوانیش هه‌مان شێوه‌یه کاتێک هه‌ست ده‌که‌ن به‌وه‌ی ژنه‌که‌ی له‌لایه‌ن پیاوێکی تره‌وه سه‌یر ده‌کرێت‌و سه‌رنجی راکێشاوه.
زۆرجار غیره له‌خۆشه‌ویستیه‌کی زۆره‌وه سه‌رهه‌ڵده‌دات، ژنه‌که هێنده هاوسه‌ره‌که‌ی خۆشده‌وێت وا ده‌زانێت هه‌ر که‌سێک قسه‌ی له‌گه‌ڵ بکات ده‌یبات بۆ خۆی، ئه‌مه‌ش کۆمه‌ڵێک کێشه له‌نێوانیان دروست ده‌بێت که ده‌بێته هۆی لاواز بوونی په‌یوه‌ندی هه‌ردوولا‌و هه‌ندێ جاریش حاڵه‌ته‌که ده‌گاته جیابوونه‌وه.
هه‌ندێ جار له‌نێوان ژن‌و پیاودا غیره شێوه‌یه‌کی تر وه‌رده‌گرێت، کاتێک ژنه‌که یان پیاوه‌که هه‌ست ده‌کات یه‌کێکیان منداڵه‌که‌ی زیاتر خۆشده‌وێت، زۆربه‌ی جار ئه‌م حاڵه‌ته لای پیاوان دروست ده‌بێت به تایبه‌تی له‌کاتی بوونی منداڵی تازه، کاتێک دایکه‌که زۆربه‌ی کاته‌کانی سه‌رقاڵی منداڵه‌کانی ده‌بێت باوکه‌که به‌ته‌نها ئه‌مێنێته‌وه، به‌هه‌مان شێوه بۆ باوکه‌که‌ش راسته که زۆربه‌ی کاته‌کانی به یاریکردن له‌گه‌ڵ منداڵه‌کانی ته‌رخان ده‌کات‌و دایکه‌که به‌ته‌نها ده‌مێنێته‌وه.
غیره شتێکی ئاساییه که له‌لای ژن‌و پیاو هه‌بێت، چونکه زۆر جار لای که‌سی به‌رامبه‌ر هه‌ستکردنه به خۆشه‌ویستی، له‌هه‌مان کاتدا هه‌ست به‌دڵنیابوون ده‌کات له‌لایه‌ن به‌رامبه‌رکه‌یه‌وه که ده‌توانێت بیپارێزێت له‌ده‌وروبه‌رو که‌سانی خراپ، به‌ڵام ئه‌گه‌ر به‌شێوه‌یه‌کی خراپ به‌کاربهێنرێت‌و رێبدرێت زاڵبیت به‌سه‌ر هه‌ست‌و سۆزو خۆشه‌ویستیه‌که‌دا ئه‌مه ده‌بێته هۆکاری پچراندنی په‌یوه‌ندی نێوان هه‌ردوولا.
ده‌توانیت به چه‌ندین شێواز غیره که‌مبکه‌یته‌وه یان به ته‌واوی نه‌یهێڵیت بیربکه‌ره‌وه له‌هه‌سته‌کانت، ئه‌گه‌ر هاتوو هاوسه‌ره‌که‌ت سه‌یری که‌سانی تری کرد بێجگه له‌تۆ زۆرت پێناخۆشه، ئه‌مه‌ش چه‌ند جارێک دووباره ده‌بێته‌وه زیاتر توڕه‌ت ده‌کات، به‌ڵام خۆراگر بهو هه‌وڵبده زاڵبیت به‌سه‌ریدا، ورده ورده خۆت رابهێنه له‌سه‌ر ئه‌وه‌ی تۆ زاڵبیت به‌سه‌ر خۆتدا نه‌ک ئه‌و، هه‌وڵبده راستیه‌که بزانیت نه‌وه‌ک ئه‌و خه‌یاڵه‌ی لاتدروست بووه بتخاته ناو کێشه‌یه‌که‌وه که بوونی نییه.
وه‌ک که‌سێکی به‌هێز بهو هه‌ست به‌دڵنیایی بکه، سه‌ره‌تای بوونی خۆشه‌ویستی به بڕیاری تۆیه، ئه‌گه‌ر هه‌ست به‌دڵنیایی نه‌که‌یت زۆر کێشه بۆ خۆت دروست ده‌که‌یت هه‌ندێ پرسیار لات دروست ده‌بێت که توشــــی خه‌مۆکی‌‌و دڵه‌ڕاوکێت ده‌کات، وه‌ک ئه‌وه‌ی مــــن جوان نیم وه‌ک که‌سانی به‌رامبه‌رم، یان که‌سێکی خۆشه‌ویست نیم وه‌ک که‌سانی تر، ئه‌مانه هه‌موو ئه‌و پرسیارانه‌ن له‌بری ئه‌وه‌ی غیره که‌م بکاته‌وه به‌ڵکو زیاد ده‌بێت‌و دواتر زاڵنابیت به‌سه‌ر کێشه‌کانتدا.
هه‌وڵبده بیر بکه‌یته‌وه غیره‌ی به‌رامبه‌ره‌که‌ت بۆچیه، له‌چی ده‌ترسیت، هه‌ندێ بابه‌ت له‌سه‌ر ئه‌و مه‌سه‌لانه بخوێنه‌ره‌وه‌و به‌دوای چاره‌سه‌ریدا بگه‌ڕێ، یاخود ئه‌و هه‌ستانه‌ی هه‌ته له‌سه‌ر کاغه‌ز بنوسه‌و چه‌ند جارێک بیخوێنه‌ره‌وه.
بیر بکه‌وه بزانه ئه‌و ترسه‌ی لاتدروست بووه تا چه‌ند راسته‌قینه‌یه، ئه‌گه‌ر پێت وایه شێوه‌ت ناشرینه، هه‌وڵبده ئه‌و بیرو بۆچونه‌ت بگۆڕیت، گرنگه خۆتت خۆش بوێت‌و له‌وه تێبگه‌یت‌و رازی بیت بهو شێوه‌یه‌ی هه‌یه، هه‌وڵبده که‌سایه‌تی خۆت بناسیت، گه‌ر ئاره‌زووت کرد شێوه‌ت بگۆریت وه‌ک گۆرینی ستایلی قژ‌و جلوبه‌رگه‌که‌ت یان شێوازی ماکیاژ کردنه‌که‌ت بێت.
به‌شی زۆری کۆتایی هێنان بهو کێشانه له‌وه‌وه ده‌بێت که بڕوات به‌خۆت هه‌بێت، ئه‌مانه‌ش چه‌ند رێگایه‌کن که یارمه‌تیت ده‌ده‌ن بۆ ئه‌وه‌ی بڕوات به‌خۆت هه‌بێت.
بڕوا بوون به‌خۆت به‌تایبه‌تی‌‌و به به‌رامبه‌ره‌که‌ت به گشتی یه‌کێکه له‌گرنگترین هۆکار بۆ تازه بوونه‌وه‌ی په‌یوه‌ندی‌و پته‌وبوونی نێوان ژن‌و مێرد، هه‌وڵبده بڕوات به‌خۆت هه‌بێت‌و بزانیت هاوسه‌ره‌که‌ت که‌سێکی خۆشبه‌خته، هه‌رکاتێک هاوسه‌ره‌که‌ت له‌شوێنێک دره‌نگ که‌وت‌و له‌واده‌ی خۆیدا نه‌گه‌رایه‌وه بۆ ماڵ یه‌کسه‌ر خه‌یاڵێکی خراپ لای خۆت دروست مه‌که‌و بزانیت لای که‌سێکی تره، بیر بکه‌ره‌وه بزانه تا چه‌ند به‌راستی بیر ده‌که‌یته‌وه‌‌و یه‌کسه‌ر بڕیار مه‌ده له‌شته‌کان.
ئه‌گه‌ر بیر کردنه‌وه‌کان زیاتر به‌لای خراپیدا رۆیشت وه‌ک له‌باشی ئه‌وا تێبگه که تۆ که‌سێکیت زیاتر سلبی بیر ده‌که‌یته‌وه ، له‌به‌رئه‌وه گله‌یی له‌به‌رامبه‌ره‌که‌ت مه‌که، به‌ڵکو هه‌وڵبده خۆت رزگار بکه‌یت له‌و بۆچونه سلبیانه‌ت، ئه‌گه‌ر به‌رده‌وامبیت له‌سه‌ر ئه‌م جۆره بیرکردنه‌وانه ته‌شه‌نه ده‌کات‌و گومان له‌ده‌وروبه‌ره‌که‌شت ده‌که‌یت.
کاتێک هه‌ست به غیره ده‌که‌یت به‌رامبه‌ر به هاوسه‌ره‌که‌ت‌و ده‌بینیت بیر کردنه‌وه‌که‌ت راسته له‌و که‌سه‌ی غیره‌ی لێده‌که‌یت، بیر بکه‌وه که تۆ هاوسه‌ره‌که‌ت خۆشده‌وێت، ئه‌ویش به‌هه‌مان شێوه چونکه هاوسه‌رگیری له‌گه‌ڵ تۆدا کردووه تۆی کردوه به‌هاوبه‌شی ژیانی، به‌ڵام ئه‌گه‌ر ئه‌م هه‌ستانه‌ت نه‌بینی له‌به‌رامبه‌رت ئه‌وا پێویست به دڵته‌نگی ناکات به‌ڵکو ژیان پێکهاتووه له‌تاقیکردنه‌وه، ئه‌وه تێبگه ژیان به‌رده‌وام ده‌بێت به‌بێ بوونی به‌رامبه‌ره‌که‌ت، ده‌توانیت چانس بده‌یت به‌که‌سێکی تر که له‌وانه‌یه زیاتر ئاسوده‌ت بکات.
Kurdish