به‌ڕێوه‌به‌ری پێوانه‌سازی‌‌و كۆنتڕۆڵی جۆریی سلێمانی، ئاماژه به‌وه ده‌كات، جگه له‌خوارده‌مه‌نی، سه‌رجه‌م ئه‌و كاڵایانه‌ی دێته سنوری پارێزگای سلێمانیه‌وه، له‌لایه‌ن ئه‌وانه‌وه، پشكنینی بۆ ده‌كرێت، ئه‌و ده‌ڵێت “ده‌رمان‌و خوارده‌مه‌نی له‌لایه‌ن ته‌ندروستیه‌وه پشكنینی بۆ ده‌كرێت‌و كاڵاكانی تریش له‌لایه‌ن ئێمه‌وه، به‌ڵام ئێمه پێمان باشه پشكنینی هه‌مو كاڵاكان‌و خوارده‌مه‌نی‌‌و ده‌رمانیش، له‌لایه‌ن یه‌ك ده‌زگاوه سه‌رپه‌رشتی بكرێت”.
به‌ڕێوه‌به‌ری پێوانه‌سازی‌‌و كۆنتڕۆڵی جۆری سلێمانی، ئه‌حمه‌د محه‌مه‌د له‌دیدارێكی ئاوێنه‌دا باس له‌وه ده‌كات، جگه له‌وه‌ی خۆیان پشكنین بۆ هه‌مو ئه‌و كاڵایانه ده‌كه‌ن كه دێته سنوری سلێمانیه‌وه، هاوكات ئه‌و كاڵایانه‌ش كه له‌توانای خۆیاندا نییه، پشكنینی بۆ بكه‌ن، له‌لایه‌ن دو كۆمپانیای فه‌ره‌نسی‌‌و سویسریه‌وه پشكنینیان بۆ ده‌كرێت، كه پێشتر حكومه‌تی هه‌رێم گرێبه‌ستی له‌گه‌ڵ كردون، بۆ پشكنینی ئه‌و كاڵایانه‌ی دێنه هه‌رێمه‌وه.
هاتنی كاڵا‌و كه‌ل‌و په‌ل بۆ سنوری پارێزگاری سلێمانی، به‌فه‌رمی له‌سێ رێگاوه‌یه، ئه‌وانیش مه‌رزه‌كانی باشماخ‌و په‌روێزخان‌و فڕۆكه‌خانه‌ی نێوده‌وڵه‌تی سلێمانی، به‌ڵام سه‌ره‌كیترینیان، وه‌ك به‌ڕێوه‌به‌ری كۆنتڕۆڵی جۆری سلێمانی ئاماژه‌ی پێده‌كات، مه‌رزی باشماخه، به‌ڵام له‌چه‌ندین لای تریشه‌وه به‌نهێنی‌‌و ئاشكرا، كاڵا به‌بێ پشكنین هاورده‌ی هه‌رێم ده‌كرێت، به‌تایبه‌ت له‌ناوه‌ڕاست‌و خواروی عێراقه‌وه‌و له‌رێگای كه‌ركوكه‌وه رۆژانه كاڵایه‌كی زۆر دێته هه‌رێمه‌وه، به‌بێ ئه‌وه‌ی بنكه‌ی پشكنینی پێوانه‌سازی‌‌و كۆنتڕۆڵی جۆریی له‌و سنوره‌دا هه‌بێت، له‌وباره‌یه‌وه، ئه‌حمه‌د محه‌مه‌د ئه‌وه ده‌خاته‌رو نیازیان هه‌یه، له‌بانیمه‌قان، بنكه‌یه‌ك بۆ ئه‌و مه‌به‌سته بكه‌نه‌وه “به‌نیازین له‌بانیمه‌قانیش بنكه‌یه‌كی كوالیتی كۆنتڕۆڵ بكه‌ینه‌وه، هه‌نگاویشمان له‌وباره‌یه‌وه ناوه، ئه‌و كاره ته‌نها هه‌ندێك رۆتینیاتی ئیداری ماوه”.
له‌ساڵی 2012دا به‌ڕێوه‌به‌رایه‌تی پێوانه‌سازی‌‌و كۆنتڕۆڵی جۆریی سلێمانی، به‌هاوكاری هه‌ردو كۆمپانیای فه‌ره‌نسی‌‌و سویسریه‌كه پشكنینی بۆ 2ملیۆن‌و 568هه‌زار ته‌ن‌و 369كیلۆ كاڵا‌و كه‌ل‌و په‌ل كردوه، له‌و بڕه‌ش 189هه‌زار 915 ته‌ن، له‌پشكنیندا ده‌رنه‌چوه رێگایان پێنه‌داوه بێته سنوری هه‌رێمه‌وه.
هه‌ردو كۆمپانیای سویسری‌‌و فه‌ره‌نسیه‌كه حكومه‌تی هه‌رێم گرێبه‌ستی له‌گه‌ڵ كردون بۆ پشكنینی كاڵا، وه‌ك به‌ڕێوه‌به‌ری پێوانه‌سازی‌‌و كۆنتڕۆڵی جۆریی باسی ده‌كات له‌زۆربه‌ی وڵاتانی جیهان نوسینگه‌یان هه‌یه، بازرگانانیش هه‌ر له‌و وڵاته‌ی كاڵاكه‌ی لێده‌هێنن پشكنینیان بۆ ده‌كرێت‌و له‌لایه‌ن ئه‌و دو كۆمپانیایه‌وه بڕوانامه‌یان پێده‌درێت‌و ئه‌و ده‌ڵێت “هه‌ر بۆ دڵنیایی خۆمان، دوای ئه‌وه‌ی بڕوانامه‌ی ئه‌و دو كۆمپانیاش هه‌یه، پشكنینیان له‌لایه‌ن ئه‌وانه‌وه بۆ كراوه، ئێمه به‌پێی گرێبه‌سته‌كه بۆمان هه‌یه، له10% هه‌مو ئه‌و كاڵایانه‌ی ئه‌وان پشكنینیان بۆكردوه، دوباره پشكنینی بۆ بكه‌ینه‌وه”.
له‌باره‌ی ئه‌و بڕه پاره‌یه‌ش، كه ئه‌و دو كۆمپانیایه وه‌ریده‌گرن بۆ پشكنینی كاڵاكان ئه‌و به‌ڕێوه‌به‌ره باس له‌وه ده‌كات، ئه‌گه‌ر كاڵاكان له‌یه‌ك دۆلاره‌وه تا 80 هه‌زار دۆلار نرخیان بێت، ئه‌وا، ئه‌وان 320 دۆلار وه‌رده‌گرن، له‌و بڕه پاره‌یه‌ش له20% ده‌ده‌نه لایه‌نی په‌یوه‌ندیداری حكومه‌ت “ئێمه ئه‌و له20% ده‌خه‌ینه حسابێكی تایبه‌تیه‌وه، به‌پاره‌كه‌ی ئامێری كوالیتی به‌رزی پشكنینی پێده‌كڕین”.
پێوانه‌كانی ئه‌و دو كۆمپانیا بۆ باش‌و خراپی كاڵاكان، به‌پێی یاسای تایبه‌تمه‌ندی عێراقی ده‌بێت، هه‌ندێ له‌بڕگه‌كانی یاسایی تایبه‌تمه‌ندی عێراقیش وه‌ك ئه‌حمه‌د محه‌مه‌د ده‌ڵێت “پێویستی به‌هه‌مواركردنه‌وه هه‌یه‌‌و ده‌بێت له‌په‌رله‌مانیش ئه‌و هه‌مواره بكرێت، گۆڕانكاریه‌كانیش له‌بڕگه‌كانیدا به‌جۆرێك بێت، له‌گه‌ڵ ئه‌م سه‌رده‌مه‌دا بگونجێ، به‌ده‌ر له‌وه هه‌ندێجار ئێمه بۆ پشكنینی كاڵا كار به‌تایبه‌تمه‌ندی ئه‌وروپی‌‌و خلیجییش ده‌كه‌ین”.
ئه‌و به‌ڕێوه‌به‌ره نكوڵی له‌وه ناكات، كه پێش ده‌ستبه‌كاربونی ئه‌وان، پشكنینی بۆ كاڵا‌و كه‌ل‌وپه‌له‌كان به‌شێوه‌یه‌كی باش نه‌كراوه، هه‌ربۆیه كاڵا‌و كه‌ل‌وپه‌لی هه‌ندێك وڵات به‌نمونه وڵاتێكی وه‌ك سین، ناوبانگی به‌خراپی رۆیشتوه، “به‌ڵام له‌ئێستادا پشكنینی كاڵا‌و كه‌ل‌وپه‌له‌كان له‌لایه‌ن ئێمه‌‌و ئه‌و دو كۆمپانیایه‌ش زۆر به‌باشی ده‌كرێت”.
چه‌ند رۆژێكه هاورده‌كردنه‌وه‌ی ئۆتۆمبیل بۆ ناو هه‌رێم ده‌ستی پێكردۆته‌وه، هاتنیشی به‌بڕوانامه‌ی پشكنینی كۆمپانیا فه‌ره‌نسی‌‌و سویسریه‌كه ده‌بێت، سه‌رباری ئه‌وه چه‌ند مه‌رجێكیش دانراوه بۆ هاتنی له‌وانه “ده‌بێت، سیسته‌می ئه‌ی بی ئێس‌و دو ئێرباكی‌‌و تایبه‌تمه‌ندیی خلیجی هه‌بێت، هاوكات نابێت جامڕه‌ش بێت”.
به‌ڕێوه‌به‌ری پێوانه‌سازی‌‌و كۆنتڕۆڵی جۆریی سلێمانی، ئه‌وه‌ش ده‌خاته‌رو كه بۆ هاتنی خوارده‌مه‌نی خراپ نابێت هاوڵاتیان گله‌یی له‌وان بكه‌ن، “بۆ خوارده‌مه‌نی خراپ، گله‌یی له‌ئێمه مه‌كه‌ن”، چونكه وه‌ك ئه‌و هێمای بۆ ده‌كات، پشكنینی خوارده‌مه‌نی له‌لای ئه‌وان نییه، به‌ڵكو به‌لایه‌نی ته‌ندروستی سپێردراوه‌و ئه‌و ده‌ڵێت “ده‌رمان‌و خوارده‌مه‌نی له‌لایه‌ن ته‌ندروستیه‌وه پشكنینی بۆ ده‌كرێت‌و كاڵاكانی تریش له‌لایه‌ن ئێمه‌وه، به‌ڵام ئێمه پێمان باشه پشكنینی هه‌مو كاڵاكان‌و خوارده‌مه‌نی‌‌و ده‌رمانیش، له‌لایه‌ن یه‌ك ده‌زگاوه سه‌رپه‌رشتی بكرێت، جا ئه‌و ده‌زگایه، ئێمه بین یان لایه‌نێكی تر ئێمه كێشه‌مان نییه”.
Kurdish