وەك هەوڵێك بۆ پاك راگرتنی ژینگەو پاراستنی تەندروستی هاوڵاتیان قائمقامیەتی سلێمانی لیژنەیەك بۆ پارێزگاری كردن لە ژینگە پێكدەهێنێت.
لەڕاگەیەندراوێكی قائمقامیەتی سلێمانی كەوێنەیەكی بۆ ژوری بازركانی و پیشەسازی سلێمانی نێردراوە تیایدا ئاماژە بەوەدەكات” لایەنە پەیوەندیدارەكانی حكومەت پێداچونەوە بە شێوازی كاركردنی كارگەكانی شاری سلێمانیدا دەكەن و لەرێگەی لیژنەی تایبەتمەندەوە چاودێری ووردی كارگەكان دەكرێت بۆ ئەوەی مەرجەكانی پاك راگرتنی ژینگە جێبەحێ بكەن و دۆكەڵ و پاشماوەی زیان بەخش تێكەڵ بە ژینگە نەكەن”
ئاوات محەمەد قائمقامی قەزای مەڵبەندی سلێمانی لەگەڵ بەڕێوەبەری فەرمانگەی ژینگەی سلێمانی و ژمارەیەك لە شارەزایانی بواری ژینگەدا كۆبوویەوە , لە كۆبونەوەكەدا قائمقامی سلێمانی رایگەیاند” بەهۆی چەندین هۆكاری دیارەوە ژینگەی هەرێمی كوردستان دووچاری پیسبونی بەردەوام دەبێتەوە , بۆ چارەسەر كردنیشی پێویستی بەخستنەگەڕی هەوڵی خەمخۆرانەی گشتگیرە”
یەكێك لە هۆكارەكانی پیسبونی ژینگەی شاری سلێمانی و دەروروبەری بوونی ئەو كارگانەیە كە وەك پێویست پابەندنین بەجێ بەجێكردنی مەرج و رێنماییە ژینگەیەكانەوە.
قائمقامی سلێمانی ئەوەشی رایگەیاند” لەمەودوا پێداچوونەوە بەشێوازی كاركردنی هەموو ئەو كارگانەدا دەكرێت كە لەسنوری پارێزگای سلێمانیدا كاردەكەن و پێویستە پابەندبن بە جێبەجێ كردنی مەرج و رێنماییە ژینگەیەكانەوە”
ئاوات محەمەد قائمقامی سلێمانی پێشنیاری كرد لیژنەیەكی تایبەتمەند بەم بوارە پێكبهێندرێت و نوێنەری فەرمانگە پەیوەندیدارەكانیش بەشداربن تێیدا بۆ ئەوەی لەرێگەی ئەو لیژنەیەوە بەدواداچون بۆ شێوازی كاركردنی كارگەكانی شاری سلێمانی و دەرەو بەری بكرێت و ئاراستە بكرێت بۆ ئەوەی مەرج و رێنماییە ژینگەیەكان وەك پێویست جێبەجێ بكەن , ئاماژەی بۆ ئەوەش كرد لە ئایندیەكی نزیكدا هەنگاوی گرنگ لەم باریەوە دەنرێت .
Kurdish